මෙරට අධිකරණ පද්ධතියේ සහ විනිසුරුවරුන්ගේ සේවා කාලයන් සම්බන්ධයෙන් සංශෝධන රැසක් ඇතුළත් ‘22 වන ආණ්ඩුක්රම ව්යවස්ථා සංශෝධන’ පනත් කෙටුම්පත අද (18) අධිකරණ අමාත්යවරයා විසින් පාර්ලිමේන්තුවට ඉදිරිපත් කරන ලදී. මෙරට ඉහළම අධිකරණවල විනිසුරුවරුන්ගේ විශ්රාම වයස ඉහළ නැංවීම සහ විනිසුරු මඬුලි පුළුල් කිරීම මෙම සංශෝධනයේ ප්රධාන අරමුණ වී තිබේ.
යෝජිත සංශෝධනයට අනුව ශ්රේෂ්ඨාධිකරණ විනිසුරුවරුන්ගේ විශ්රාම වයස අවුරුදු 65 සිට 67 දක්වාත්, අභියාචනාධිකරණ විනිසුරුවරුන්ගේ විශ්රාම වයස අවුරුදු 63 සිට 65 දක්වාත් ඉහළ නැංවීමට යෝජනා කර ඇත. එමෙන්ම අගවිනිසුරුවරයාට සිය ධුරය දැරිය හැකි උපරිම කාලය වසර 6ක් ලෙස සීමා කර ඇති අතර, එම කාලය සම්පූර්ණ වීමට පෙර වයස අවුරුදු 67 ට එළඹෙන්නේ නම් ඔහු විශ්රාම යා යුතු වේ. මීට සමගාමීව අධිකරණ සංවිධාන පනත ද සංශෝධනය කරමින් මහාධිකරණ විනිසුරුවරුන්ගේ විශ්රාම වයස අවුරුදු 63 දක්වාත්, අනෙකුත් විනිසුරුවරුන්ගේ විශ්රාම වයස අවුරුදු 62 දක්වාත් ඉහළ දමා ඇත.
යුක්තිය පසිඳලීමේ ක්රියාවලිය කඩිනම් කිරීම සහ නඩු ගොඩගැසීම අවම කිරීමේ අරමුණින් අභියාචනාධිකරණ විනිසුරුවරුන් සංඛ්යාව 20 සිට 24 දක්වාත්, මහාධිකරණ විනිසුරුවරුන් සංඛ්යාව 110 සිට 120 දක්වාත් ඉහළ නැංවීමට ද මෙයින් පියවර ගෙන තිබේ.
මෙම පනත් කෙටුම්පත පාර්ලිමේන්තුවට ඉදිරිපත් කිරීමත් සමඟ, අද සිට දින 14ක කාලයක් ඒ සම්බන්ධයෙන් විරෝධතා දැක්වීමට හෝ පෙත්සම් ඉදිරිපත් කිරීමට ඕනෑම පුරවැසියෙකුට අවස්ථාව හිමිවේ. ඉන් අනතුරුව දින 3ක් සහ 21ක් අතර කාලයකදී ශ්රේෂ්ඨාධිකරණය විසින් සිය අර්ථ නිරූපණය ලබා දිය යුතුය. එහිදී මෙම සංශෝධනය සම්මත කිරීමට අවශ්ය බහුතරය සහ ජනමත විචාරණයක අවශ්යතාව පිළිබඳව අධිකරණය තීරණය කරනු ඇත. පළපුරුදු විනිසුරුවරුන්ගේ සේවා කාලය දීර්ඝ කිරීම සහ විනිසුරු සංඛ්යාව වැඩිකිරීම මගින් නීතියේ ආධිපත්යය තහවුරු කිරීමටත් ජනතාවට කඩිනම් යුක්තිය ඉටු කිරීමටත් දායක වනු ඇතැයි අපේක්ෂා කෙරේ.
