මෙරට පොදු ප්රවාහන ක්ෂේත්රයේ විධිමත් වෙනසක් සිදු කරමින්, දැනට ධාවනය නොවන සියලුම පෞද්ගලික බස් බලපත්ර සම්බන්ධයෙන් රජය දැඩි තීන්දුවක් ගෙන තිබේ. ඒ අනුව, දැනට සේවාවන් අත්හිටුවා ඇති බස් බලපත්ර හිමියන් ජූනි මස 30 වනදාට පෙර සිය සේවාවන් යළි ආරම්භ කළ යුතු අතර, එසේ නොවන බලපත්ර වහාම අවලංගු කර විවෘත ටෙන්ඩර් පටිපාටියක් යටතේ නව හිමිකරුවන් වෙත ලබා දීමට පියවර ගැනේ.
පාර්ලිමේන්තුවේදී අදහස් දක්වමින් වෛද්ය ප්රසන්න ගුණසේන පෙන්වා දුන්නේ, මෙතෙක් කලක් පැවති දේශපාලන හිතවත්කම් මත බස් බලපත්ර ලබා දීමේ අත්තනෝමතික ක්රමය මුළුමනින්ම අවසන් කරන බවයි. ඒ වෙනුවට, සුදුසුකම් මත පදනම් වූ විනිවිදභාවයකින් යුතු නව ලකුණු ක්රමවේදයක් (Point-based system) සඳහා කැබිනට් අනුමැතිය හිමිව තිබේ. මෙමගින් අයදුම්කරුවන්ට තමන්ගේ සුදුසුකම්වලට ලැබෙන ලකුණු ප්රමාණය තමන්ටම ගණනය කරගත හැකි අතර, බලපත්ර ලබා ගැනීම සඳහා දේශපාලනඥයන් පසුපස යාමට මින් ඉදිරියට අවශ්ය නොවන බව ඔහු අවධාරණය කළේය.
ජාතික ප්රවාහන කොමිෂන් සභාවේ (NTC) දත්තවලට අනුව, දැනට නිල වශයෙන් සක්රීය මට්ටමේ පවතින්නේ බස් බලපත්ර 2,568ක් පමණි. එහෙත්, බලපත්ර ලබාගෙන ඇතත් ජනතාවට සේවය ලබා නොදෙන බස් බලපත්ර 357ක් හඳුනාගෙන තිබේ. මෙයට තමන්ට බස් රථ නඩත්තු කළ නොහැකි බව පවසමින් හිමිකරුවන් විසින්ම භාර දුන් බලපත්ර 49ක් සහ බලපත්ර ලබාගෙන ඇතත් මෙතෙක් ධාවනය ආරම්භ කර නොමැති බලපත්ර 308ක් ඇතුළත් වේ.
මෙම ධාවනය නොවන බලපත්ර 357 හිමියන්ට ජූනි 30 වනදා දක්වා සහන කාලයක් ලබා දී ඇත. එම කාලය තුළ බස් රථ ධාවනයට එක් නොකරන්නේ නම්, එම බලපත්ර අවලංගු කර නව ලකුණු ක්රමය යටතේ විවෘත ටෙන්ඩර් මගින් පොදු මහජනතාවට අවස්ථාව සලසා දීමට රජය සූදානම් වේ.
මීට අමතරව, මගී ඉල්ලුම මත පදනම්ව නව බස් මාර්ග සහ සේවාවන් පුළුල් කිරීමට ද රජය සැලසුම් කර ඇත. ජාතික ප්රවාහන කොමිෂන් සභාව විසින් සිදු කරන විද්යාත්මක සමීක්ෂණ මගින් මගී අවශ්යතා වැඩි මාර්ග හඳුනාගෙන, ජූලි මාසයේ සිට එම මාර්ග සඳහා නව බලපත්ර සහ සුඛෝපභෝගී (AC) බස් සේවාවන් ලබා දීමට කටයුතු කරනු ඇත. මෙම ප්රතිසංස්කරණය දේශපාලන අනුග්රහය වෙනුවට පොදු මහජන අවශ්යතාව පෙරදැරි කරගත් සුවිශේෂී පියවරක් වනු ඇතැයි වෛද්ය ප්රසන්න ගුණසේන වැඩිදුරටත් සඳහන් කළේය.
