ඉස්ලාම් දහමට අපහාසාත්මක වන අයුරින් ප්රකාශ සිදුකළ බවට චෝදනා ලබා සිටින බොදු බල සේනා සංවිධානයේ ලේකම් පූජ්ය ගලගොඩඅත්තේ ඥානසාර හිමියන්ට එරෙහි නඩුවේ විභාග දිනය තීන්දු කිරීම සඳහා එළඹෙන ජුනි මස 26 වැනිදා එය යළි කැඳවීමට කොළඹ මහාධිකරණය අද නියෝග කළේය.
මෙම නඩුව කැඳවනු ලැබුවේ නීතිපතිවරයා විසින් පවරා ඇති අධිචෝදනා පත්රයකට අනුවය. නඩුව කැඳවූ අවස්ථාවේදී විත්තිකාර ඥානසාර හිමියන් අධිකරණය හමුවේ පෙනී සිටියේය.
මෙහිදී නඩුවට අදාළ පූර්ව නඩු විභාග සම්මන්ත්රණය (Pre-trial conference) අවසන් කළ මහාධිකරණ විනිසුරු බුද්ධික සී. රාගල, නඩු විභාගය ආරම්භ කරන නිශ්චිත දිනය ප්රකාශයට පත් කිරීම සඳහා ජුනි 26 වැනිදා දිනය නියම කරනු ලැබීය. ආගමික සහජීවනයට බාධා වන අයුරින් අදහස් පළ කිරීම සම්බන්ධයෙන් වූ මෙම නඩුව පිළිබඳව ඉදිරි විභාග කටයුතු එදිනට තීන්දු වනු ඇත.
