දිවයිනට බලපා ඇති පවතින අයහපත් කාලගුණික තත්ත්වය තවදුරටත් තීව්ර වෙමින් පවතින බැවින්, පළාත් සහ දිස්ත්රික්ක කිහිපයක් සඳහා තද වැසි පිළිබඳ රතු නිවේදනයක් නිකුත් කිරීමට කාලගුණ විද්යා දෙපාර්තමේන්තුව පියවර ගෙන තිබේ.
ඒ අනුව බස්නාහිර, සබරගමුව සහ වයඹ පළාත්වලත්, මහනුවර, නුවරඑළිය, ගාල්ල සහ මාතර දිස්ත්රික්කවලත් ඇතැම් ස්ථානවලට මිලිමීටර් 150 ඉක්මවූ ඉතා තද වැසි ඇතිවිය හැකි බව එම දෙපාර්තමේන්තුව අවධාරණය කරයි. ස්වභාවික විපත් පිළිබඳ පූර්ව අනතුරු ඇඟවීමේ මධ්යස්ථානය මගින් අද (14) පස්වරු 5.30ට නිකුත් කළ මෙම නිවේදනය හෙට (15) පෙරවරු 8.30 දක්වා බලපැවැත්වේ.
අද උදෑසන ලබාගත් දත්ත විශ්ලේෂණයට අනුව, ශ්රී ලංකාවට ඊසාන දෙසින් ස්ථාපිතව ඇති වායුගෝලීය අඩු පීඩන කලාපය තවදුරටත් සක්රීයව පවතී. කෙසේ වෙතත්, ඉදිරි පැය 48 ඇතුළත මෙම පද්ධතිය දිවයිනෙන් ඉවතට ගමන් කරනු ඇතැයි අපේක්ෂා කෙරේ. මීට අමතරව උතුරු පළාතේ ඇතැම් ප්රදේශවලට මිලිමීටර් 100ට වැඩි තද වැසි ඇතිවීමේ හැකියාවක් පවතින බව ද කාලගුණ අනාවැකියේ සඳහන් වේ.
තද වැසි සමඟ ඇතිවිය හැකි ගිගුරුම්, තද සුළං සහ අකුණු අනතුරු පිළිබඳව දැඩි අවධානයෙන් පසුවන ලෙසත්, සිදුවිය හැකි අනතුරු අවම කර ගැනීමට අවශ්ය පූර්ව ආරක්ෂිත පියවර ගන්නා ලෙසත් කාලගුණ විද්යා දෙපාර්තමේන්තුව මහජනතාවගෙන් වැඩිදුරටත් ඉල්ලා සිටියි.
