ඩිජිටල් පරිවර්තනය සහ කෘතිම බුද්ධිය (AI) ක්ෂේත්රයන්හි ශ්රී ලංකාව සහ ජපානය අතර පවතින සහයෝගීතාව තවදුරටත් ශක්තිමත් කිරීමේ අරමුණින්, ඩිජිටල් ආර්ථික නියෝජ්ය අමාත්ය ඉංජිනේරු එරංග වීරරත්න සහ ජපාන ජාත්යන්තර සහයෝගිතා නියෝජිතායතනයේ (JICA) ජ්යෙෂ්ඨ උප සභාපති හාරා ෂොහෙයි ප්රමුඛ නියෝජිත පිරිසක් අතර විශේෂ සාකච්ඡාවක් ඊයේ (14) ඩිජිටල් ආර්ථික අමාත්යාංශයේදී පැවැත්විණි.
මෙහිදී ප්රමුඛතා ක්ෂේත්ර දෙකක් ඔස්සේ ද්විපාර්ශ්වික සහයෝගීතාව වර්ධනය කරගැනීම පිළිබඳව දීර්ඝ වශයෙන් සාකච්ඡා විය. විශේෂයෙන්ම ඩිජිටල් රූපවාහිනී ව්යාපෘතියේ කටයුතු කඩිනම් කිරීම සහ එහි පවතින ප්රායෝගික ගැටලු නිරාකරණය කරගැනීමේ අවශ්යතාව නියෝජ්ය අමාත්යවරයා විසින් පෙන්වා දෙන ලදී. එමෙන්ම, දේශීය කර්මාන්ත නංවාලීම සහ ආනයන මත රඳා පැවැත්ම අවම කිරීමේ අරමුණින්, ඩිජිටල් සංඥා ලබාගැනීමට අවශ්ය Set-Top Boxes මෙරටදීම නිෂ්පාදනය කිරීමේ හැකියාව පිළිබඳව ද මෙහිදී විශේෂ අවධානයක් යොමු කෙරිණි.
ඊට අමතරව, ශ්රී ලංකාවේ අනාගත කෘතිම බුද්ධි (AI) යටිතල පහසුකම් සංවර්ධනය වෙනුවෙන් ජාතික AI දත්ත මධ්යස්ථානයක් (National AI Data Centre) පිහිටුවීම පිළිබඳව ද දෙපාර්ශ්වය අතර සාකච්ඡා පවත්වා ඇත. ඊට සමගාමීව ධාරිතා සංවර්ධන වැඩසටහන්, පුහුණු කිරීම්, ශ්රී ලංකාවට ගැලපෙන AI විසඳුම් නිර්මාණය කිරීම මෙන්ම ජාත්යන්තර තාක්ෂණික දැනුම සහ හොඳම ප්රායෝගික භාවිතයන් හුවමාරු කරගැනීම සම්බන්ධයෙන් ද අවධානය යොමු විය.
JICA ආයතනය විසින් ශ්රී ලංකාව වෙත ලබාදෙන තාක්ෂණික සහයෝගීතාව මෙහිදී ඇගයීමට ලක් වූ අතර, දෙරට අතර පවතින මිත්රත්වය තවදුරටත් ශක්තිමත් කරමින් මෙම ව්යාපෘතීන් සාර්ථකව ඉදිරියට ගෙන යාමට කටයුතු කරන බව නියෝජ්ය අමාත්යවරයා අවධාරණය කළේය.
මෙම අවස්ථාව සඳහා ඩිජිටල් ආර්ථික අමාත්යාංශයේ ලේකම් වරුණ ශ්රී ධනපාල, ඩිජිටල් ආර්ථිකය පිළිබඳ ජනාධිපති ජ්යෙෂ්ඨ උපදේශක සහ GovTech සභාපති ආචාර්ය හාන්ස් විජයසූරිය මෙන්ම ශ්රී ලංකාවේ JICA ප්රධාන නියෝජිත ෂිගෙකි හොන්සු ද සහභාගී වූහ.
