ස්වභාවික ආපදා මඟින් පමණක් නොව, දුර්වල අධිකරණ පද්ධතියක් හේතුවෙන් ද රටක් ඉතා කෙටි කාලයකින් විනාශයට පත්විය හැකි බව අගවිනිසුරු ප්රීති පද්මන් සූරසේන අවධාරණය කරයි. එවැනි තත්ත්වයක් තුළ ඇතිවන බිඳවැටීමක් ජාත්යන්තර සහාය හෝ ආධාර මඟින් යථා තත්ත්වයට පත් කළ නොහැකි බව ඔහු පෙන්වා දෙයි. ශ්රී ලංකා විනිශ්චයකාරවරුන්ගේ ආයතනයේ නව මහේස්ත්රාත්වරුන් වෙනුවෙන් පැවැති උත්සවයක් අමතමින් ඔහු මේ බව සඳහන් කළේය.
අධිකරණ සංවිධාන පනතේ ප්රතිපාදන උපුටා දක්වමින් අගවිනිසුරුවරයා කියා සිටියේ නීතිඥවරුන් ද සදාචාරාත්මක හා පිළිගත හැකි හැසිරීමක් අඛණ්ඩව පවත්වාගත යුතු බවයි. නීතිඥ වෘත්තිය සඳහා බඳවාගත යුත්තේ යහපත් කීර්තියක්, නිපුණතාවක් සහ දැනුමක් ඇති පුද්ගලයන් පමණක් බවත්, ලියාපදිංචි වීමෙන් පසුව ද එම වගකීම අතපසු නොකර ක්රියා කළ යුතු බවත් ඔහු පැවසීය.
ජනතා ස්වෛරීභාවය පිළිබඳ කරුණු පැහැදිලි කළ ප්රීති පද්මන් සූරසේන, විධායකය, ව්යවස්ථාදායකය, අධිකරණය සහ ඡන්ද බලය යන ප්රධාන සංරචක හතරෙන් අධිකරණ බලය ජනතාවගෙන් උරුම වූවක් බව සිහිපත් කළේය. “ඔබ එම බලය ඔබේ නිවසින් ගෙන එන්නේ නැත. අධිකරණ සේවා කොමිසම හෝ අප ඔබට බලය ලබා දෙන්නේ ද නැත. එම බලය ජනතාව සතුය. එය ක්රියාත්මක කළ යුත්තේ ද ජනතාවගේම ප්රයෝජනය සඳහා පමණි,” යැයි ඔහු අවධාරණය කළේය.
අධිකරණයේ ස්වාධීනත්වය යනු විනිසුරුවරුන්ගේ පෞද්ගලික වාසිය සඳහා පවතින්නක් නොව, ජනතාව තබා ඇති විශ්වාසය ආරක්ෂා කිරීම වෙනුවෙන් පවත්වාගත යුතු දෙයක් බව ද අගවිනිසුරුවරයා පෙන්වා දුන්නේය. විනිසුරුවරයකු වූ පමණින් තමන්ට රුචි ඕනෑම දෙයක් කළ හැකි යැයි සිතීම වැරදි බවත්, ස්වාධීනත්වය සැමවිටම ජනතාවගේ යහපත සමඟ බැඳී පවතින බවත් ඔහු වැඩිදුරටත් සඳහන් කළේය.
