කොළඹ නව මැගසින් බන්ධනාගාරයේ සහ කුරුවිට බන්ධනාගාරයේ රැඳවියන් පිරිසක් කලහකාරී ලෙස හැසිරීමට හේතු වූ මූලික කරුණු සහ ඒ හා සබැඳි රජයේ මත්ද්රව්ය මර්දන වැඩපිළිවෙළ පිළිබඳව තොරතුරු අනාවරණය වී තිබේ.
රජය විසින් බන්ධනාගාර පද්ධතිය තුළ ක්රියාත්මක කරනු ලබන මත්ද්රව්ය තුරන් කිරීමේ සහ ආරක්ෂාව දැඩි කිරීමේ විශේෂ වැඩපිළිවෙළ යටතේ, බන්ධනාගාර තාප්පයට ඉහළින් ඇතුළතට විසි කරන ලද කුඩා පාර්සලයක් බන්ධනාගාර නිලධාරියෙකු විසින් වහාම සිය භාරයට ගැනීමට පියවර ගෙන ඇත. මෙම මත්ද්රව්ය මර්දන ක්රියාවලියට එරෙහි වෙමින් සහ සිය සැපයුම් මාර්ග අවහිර වීම පිළිබඳ උරණ වෙමින් රැඳවියන් පිරිසක් මෙලෙස කලහකාරී ලෙස හැසිරීමට පටන් ගෙන තිබේ.
නව මැගසින් බන්ධනාගාරයේ ඊයේ රාත්රියේ හටගත් මෙම නොසන්සුන්කාරී තත්ත්වය මේ වන විට සම්පූර්ණයෙන්ම පාලනය කර ඇති බව අධිකරණ අමාත්ය හර්ෂණ නානායක්කා පවසයි.
එහිදී සිරමැදිරියක අගුළු කඩාගෙන රැඳවියන් හතළිහකට අධික පිරිසක් පිටතට පැමිණ ඇති අතර, බන්ධනාගාර නිලධාරීන්, පොලීසිය සහ පොලිස් විශේෂ කාර්ය බලකායේ නිලධාරීන් එක්ව ඔවුන් යළි සිරකුටි වෙත යොමු කිරීමට පියවර ගෙන ඇත. රජයේ මත්ද්රව්ය මර්දන ක්රියාවලියට බාධා කරමින් සිදු වූ මෙම කලහකාරී සිදුවීමට මුල් වූ බවට සැක කෙරෙන රැඳවියන් දස දෙනෙකු පමණ වහාම වෙනත් බන්ධනාගාර වෙත මාරු කිරීමටද කටයුතු කර තිබේ.
මේ අතර, කුරුවිට බන්ධනාගාරයේද ඊයේ රාත්රියේ සහ අද උදෑසන සමාන ආකාරයේ නොසන්සුන්කාරී තත්ත්වයන් හටගෙන ඇත. එහිදී රැඳවියන් පිරිසක් බන්ධනාගාර රෝහලටද අලාභහානි සිදු කර ඇති අතර, තත්ත්වය පාලනය කිරීම සඳහා කඳුළු ගෑස් ප්රහාරයක් එල්ල කිරීමට බන්ධනාගාර බලධාරීන්ට සිදුව ඇති බව බන්ධනාගාර ප්රකාශකයෙකු සඳහන් කළේය.
බන්ධනාගාර තුළ මත්ද්රව්ය ජාවාරම් මුළුමනින්ම මර්දනය කිරීමේ රාජ්ය ප්රතිපත්තිය තවදුරටත් දැඩි කරමින්, බන්ධනාගාර පරිශ්රයන් සහ අවට ප්රදේශවල ආරක්ෂාව තහවුරු කිරීම සඳහා ත්රිවිධ හමුදා සාමාජිකයින්ද යොදවා ඇති අතර, තත්ත්වය නිරීක්ෂණය කිරීම සඳහා ශ්රී ලංකා ගුවන් හමුදාවේ ඩ්රෝන යානාද භාවිත කර තිබේ.
