මින් පෙර සිදුකරන ලද ජනාධිපති අරමුදල අවභාවිතා කිරීම් සම්බන්ධව තොරතුරු සොයා බලා රටට හෙළිකරන බවත් නැවත කිසිසේත්ම එවන් අවභාවිතාවයන් සිදුවීමට ඉඩ නොතබන බවත් අගමැති ආචාර්‍ය හරිනි අමරසූරිය ඊයේ (05) පාර්ලිමේන්තුවේ ආණ්ඩු පක්ෂ මන්ත්‍රීවරුයෙකු විසින් නැගූ ප්‍රශ්නයකට පිළිතුරු දෙමින් දී ප්‍රකාශ කළාය.
ජනාධිපති අරමුදල සඳහා ඉල්ලීම් යොමු කිරීමට සහ ජනතාවට එහි ප්‍රතිලාභ ලබා ගැනීමේ ක්‍රමවේදය සරල කරමින් අරමුදල වෙත අයදුම් කිරීමට ප්‍රාදේශීය ලේකම් කොට්ඨාස මට්ටමින් අවස්ථාව ලබා දීමට රජය අදහස් කරන බව ඇය එහිදී ප්‍රාකාශ කළාය.
ඒ අනුව දිවයිනේ පිහිටි ප්‍රාදේශීය ලේකම් කොට්ඨාස 341ම ආවරණය වන පරිදි ජනාධිපති අරමුදලේ අයදුම්පත් භාර ගැනීමේ සේවා පුළුල් කිරීම, ප්‍රාදේශීය ලේකම් කාර්යාල මඟින් සේවාලාභීන්ට ගෙවීම් කටයුතු සිදුකිරීම, එම විශයන්ට අදාළව කටයුතු කරන ප්‍රාදේශීය ලේකම් කාර්යාලවල සේවයේ නියුතු නිලධාරීන් සඳහා අවශ්‍ය මූලික පුහුණුව ලබා දීම යන කාරණා සම්බන්ධව ජනාධිපති අරමුදල මේ වනවිට කටයුතු කරමින් සිටින බවද අගමැති ආචාර්‍ය හරිනි අමරසූරිය ප්‍රකාශ කළාය.
එමෙන්ම ජනාධිපති අරමුදල තවදුරටත් ජනතාවට සමීප කිරීමේ සහ අයදුම් කිරීමේ පහසුව වෙනුවෙන් මේ සියලු කටයුතු සඳහා නව පරිගණක පද්ධතියක් හඳුන්වා දෙනු ලබන බවත් එම පද්ධතිය හරහා මාර්ගගත ක්‍රමය ඔස්සේ අරමුදල සඳහා ජනතාවට අයදුම් කිරීමේ ඉඩ ප්‍රස්ථාව සැලසෙන බවත් ඇය පැවසුවාය.
