පාසල් ළමුන් ප්‍රවාහනය කරන වෑන් රථ සඳහා සීසීටීවී කැමරා පද්ධති අනිවාර්ය කිරීමට කටයුතු කරන බව ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායක පවසයි.
අද (24) පාර්ලිමේන්තුව අමතමින් ඔහු සඳහන් කළේ, පොදු ප්‍රවාහනය තුළ කාන්තාවන්ට සහ දරුවන්ට සිදුවන හිංසා සහ හිරිහැර වැඩිවී ඇති බවත්, එය අවම කිරීම සඳහා අවශ්‍ය ක්‍රියාමාර්ග ගැනීමට රජය කැපවී සිටින බවත්ය.
ඒ අනුව, පාසල් ප්‍රවාහන සේවා සහ කාර්යාල ප්‍රවාහන සේවා සඳහා විධිමත් මාර්ගෝපදේශ මාලාවක් ලබන ජනවාරි මාසයේ සිට හඳුන්වා දීමටද කටයුතු කරන බව අමාත්‍යවරයා මෙහිදී හෙළි කළේය.
මෙහිදී වැඩිදුරටත් අදහස් දැක්වූ බිමල් රත්නායක, “මේකට තියෙන එකම උත්තරය තමයි මගීන් ශක්තිමත් කරන එක. කාන්තාවකට හෝ දරුවෙකුට අතවරයක් කරන්න කවුරුහරි උත්සාහ කරනවා නම්, ඒක නොදැක්කා වගේ ඉන්නේ නැතුව ඊට එරෙහිව නැගී සිටින මිනිසුන් අවශ්‍යයි. නමුත් බස් කර්මාන්තයේ පවතින නපුරු තත්ත්වයන් නිසා, මිනිස්සු බයයි තව කෙනෙක් වෙනුවෙන් ඉදිරිපත් වෙන්න,” යනුවෙන් පැවසීය.
බස් සහ ත්‍රිරෝද රථ කර්මාන්තය වෘත්තීය මට්ටමකට ගෙන ඒම, මෙම ගැටලුවට විසඳුමක් වනු ඇති බවටද ඔහු විශ්වාසය පළ කළේය.
