උතුරු සහ නැගෙනහිර පළාත්වල ජනතාව මුහුණ දෙන ගැටලු සඳහා පැරණි දේශපාලන විසඳුම් තවදුරටත් සුදුසු නොවන බැවින්, ඒ සඳහා නව දේශපාලන විසඳුමකට එළඹීමේ අවශ්‍යතාව ජනාධිපති අනුර කුමාර දිසානායක අවධාරණය කළේය.
ජනාධිපතිවරයා මේ බව පැවසුවේ, දෙමළ ජාතික සන්ධානයේ ඉල්ලීමකට අනුව, එම පක්ෂයේ නියෝජිතයින් සමග අද (19) පස්වරුවේ ජනාධිපති ලේකම් කාර්යාලයේදී පැවති හමුවකදීය.
මෙම සාකච්ඡාවේදී පළාත් සභා මැතිවරණය පැවැත්වීම සහ නව ආණ්ඩුක්‍රම ව්‍යවස්ථාවක අවශ්‍යතාව පිළිබඳව අවධානය යොමු විය. “උතුරු සහ නැගෙනහිර ජනතාවගේ ගැටලු විසඳීමට නව දේශපාලන විසඳුමක් කරා යා යුතු බව රජය විශ්වාස කරනවා. ඒ සඳහා සියලු දෙනාගේම සහාය අපේක්ෂා කරනවා,” යැයි ජනාධිපතිවරයා පැවසීය.
උතුරු සහ නැගෙනහිර ජනතාව දීර්ඝ කාලයක සිට මුහුණ දෙන ඉඩම් හා ධීවර ගැටලු, යටිතල පහසුකම් අවශ්‍යතා සහ සංවර්ධන ව්‍යාපෘති පිළිබඳවද මෙහිදී පුළුල් ලෙස සාකච්ඡා කෙරිණි. මන්ත්‍රීවරුන් විසින් මතු කරන ලද ඇතැම් ගැටලුවලට කඩිනම් විසඳුම් ලබා දෙන ලෙස ජනාධිපතිවරයා එම ස්ථානයේදීම අදාළ නිලධාරීන්ට උපදෙස් ලබා දුන්නේය.
උතුරේ සංවර්ධනය සඳහා රජය ක්‍රියාත්මක කරන ඕනෑම වැඩපිළිවෙළකට තම පක්ෂයේ පූර්ණ සහයෝගය ලබා දෙන බව දෙමළ ජාතික සන්ධානයේ නියෝජිතයෝ මෙහිදී සහතික වූහ.
“ජාතිවාදයට එරෙහිව ආණ්ඩුව ගන්නා ඕනෑම තීරණයකට දෙමළ ජනතාව නියෝජනය කරන පක්ෂයක් ලෙස අපගේ සහයෝගය ලබා දීමට සූදානම්,” යැයි හිටපු පාර්ලිමේන්තු මන්ත්‍රී, නීතිඥ එම්. ඒ. සුමන්දිරන් මෙහිදී ප්‍රකාශ කළේය.
