මත්ද්‍රව්‍ය ජාවාරම්කරුවන් අත්අඩංගුවට ගැනීමට සමගාමීව, මත්ද්‍රව්‍යවලට ඇබ්බැහි වූ පුද්ගලයින් පුනරුත්ථාපනය කිරීමේ මූලික පියවරද මේ වන විට ගනිමින් සිටින බව මහජන ආරක්ෂක අමාත්‍ය ආනන්ද විජේපාල පවසයි.
විෂ මත් උවදුර මැඩලීමේ “රටම එකට” ජාතික මෙහෙයුමට අදාළව, ගම්පහ දිස්ත්‍රික් මෙහෙයුම් සභාව පිහිටුවීමේ අවස්ථාවට එක්වෙමින් ඔහු මේ බව සඳහන් කළේය.
“රටම එකට” ජාතික මෙහෙයුම, ප්‍රධාන සංවිධාන තල 4ක් යටතේ ක්‍රියාත්මක කිරීමට සැලසුම් කර ඇති බවත්, ඒ අනුව ජනාධිපති අනුර කුමාර දිසානායකගේ සභාපතිත්වයෙන් ජාතික මෙහෙයුම් සභාව දැනටමත් ස්ථාපිත කර ඇති බවත් අමාත්‍යවරයා පැවසීය.
“අපි දිස්ත්‍රික් මෙහෙයුම් සභා පිහිටුවීම මේ වන විට සිදු කරනවා. කොළඹ දිස්ත්‍රික්කය දැනටමත් පිහිටුවා අවසන්. ඉදිරියේදී සියලුම දිස්ත්‍රික්ක ආවරණය කරනවා. ඉන් අනතුරුව ප්‍රාදේශීය මෙහෙයුම් සභා සහ දැනටමත් පිහිටුවා ඇති මහජන ආරක්ෂක කමිටු හරහා මෙම වැඩපිළිවෙළ ගමට ගෙන යනවා,” යැයි ඔහු කියා සිටියේය.
මෙම මෙහෙයුම සාර්ථක කරගැනීම සඳහා අනුකමිටු 5ක් ද පත්කර ඇති බවත්, මෙම සංවිධාන ජාලය හරහා වඩාත් ක්‍රමවත්ව සහ සංවිධානාත්මකව මත්ද්‍රව්‍ය නිවාරණ කටයුතු සිදුකිරීමට අපේක්ෂා කරන බවත් ආනන්ද විජේපාල වැඩිදුරටත් පැවසීය.
මෙම අවස්ථාව සඳහා ගම්පහ දිස්ත්‍රික්කයේ මහා සංඝරත්නය, අමාත්‍ය අනුර කරුණාතිලක, නියෝජ්‍ය අමාත්‍ය මහින්ද ජයසිංහ, ප්‍රදේශයේ දේශපාලන අධිකාරිය, ත්‍රිවිධ හමුදාවේ සහ පොලීසියේ ජ්‍යෙෂ්ඨ නිලධාරීන් මෙන්ම දිසාපතිවරයා ඇතුළු රාජ්‍ය නිලධාරීන් රැසක් සහභාගී වූහ.
