2026 වර්ෂය සඳහා වන අයවැය ලේඛනය, මුදල් අමාත්‍යවරයා ලෙස ජනාධිපති අනුර කුමාර දිසානායක විසින් හෙට (07) දින පාර්ලිමේන්තුවට ඉදිරිපත් කිරීමට නියමිතය.
මෙය, වත්මන් ආණ්ඩුව පාර්ලිමේන්තුවට ඉදිරිපත් කරන දෙවන අයවැය වන අතර, ශ්‍රී ලංකා ඉතිහාසයේ 80 වන අයවැය ලේඛනය ලෙසද සැලකේ. අයවැය කතාව හෙට පස්වරු 1.30ට ආරම්භ වීමට නියමිතය.
2026 වසර සඳහා රජය ඇස්තමේන්තු කර ඇති සමස්ත වියදම රුපියල් බිලියන 4,434කි. මෙවර විසර්ජන පනත් කෙටුම්පතෙන් වැඩිම මුදලක් වෙන් කර ඇත්තේ මුදල් අමාත්‍යාංශයට වන අතර, එම මුදල රුපියල් බිලියන 634කි. ඊට අමතරව, සෞඛ්‍ය හා ජනමාධ්‍ය අමාත්‍යාංශය සඳහා රුපියල් බිලියන 554ක්, ආරක්ෂක අමාත්‍යාංශය සඳහා රුපියල් බිලියන 455ක් සහ අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සඳහා රුපියල් බිලියන 301ක් වෙන්කර තිබේ.
අයවැය දෙවන වර කියවීමේ විවාදය දින 6ක් පුරා පැවැත්වෙන අතර, ඊට අදාළ ඡන්ද විමසීම නොවැම්බර් 14 වනදා සවස 6.00ට පැවැත්වීමට නියමිතය. කාරක සභා අවස්ථා විවාදය නොවැම්බර් 15 සිට දෙසැම්බර් 05 දක්වා දින 17ක් පුරා පැවැත්වෙන අතර, තුන්වන වර කියවීමේ ඡන්ද විමසීම දෙසැම්බර් 05 වනදා සවස 6.00ට පැවැත්වේ.
අයවැය යෝජනාවල අවසන් ලේඛනය, ජනාධිපති අනුර කුමාර දිසානායක විසින් මේ වන විටත් නිරීක්ෂණය කර ඇති බවද වාර්තා වේ.
