සම්පූර්ණ බදු ආදායම් නිසි පරිදි රැස්කිරීම දේශීය ආදායම් දෙපාර්තමේන්තුවේ මූලික වගකීමක් බව ජනාධිපති අනුර කුමාර දිසානායක මහතා අවධාරණය කර සිටී.
ජනාධිපති ලේකම් කාර්යාලයේදී දේශීය ආදායම් දෙපාර්තමේන්තු නිලධාරීන් සමඟ පැවැත්වූ විශේෂ සාකච්ඡාවකදී ජනාධිපතිවරයා මෙම අදහස් පළ කළේය.
වත්මන් වසර සඳහා දේශීය ආදායම් දෙපාර්තමේන්තුව ඉලක්කගත කර ඇති බදු ආදායම සම්පූර්ණයෙන් සපුරාගැනීම සඳහා අනුගමනය කළ යුතු උපාය මාර්ග පිළිබඳව සවිස්තරාත්මක සාකච්ඡාවක් මෙහිදී සිදු කෙරිණි.
ජනාධිපති මාධ්‍ය අංශය නිකුත් කළ නිවේදනයකට අනුව, දැනට අය නොකරන බදු ආදායම් නිසි ලෙස රැස්කිරීම සඳහා වඩාත් කාර්යක්ෂම හා ප්‍රබල මැදිහත්වීමක අවශ්‍යතාව ජනාධිපතිවරයා විසින් පෙන්වා දී ඇත.
රටට හිමිවිය යුතු සියලුම බදු ආදායම් නිසි ලෙස එකතු කිරීමට අවශ්‍ය සියලු පියවර ගන්නා ලෙසද ජනාධිපතිවරයා එහිදී දේශීය ආදායම් දෙපාර්තමේන්තු නිලධාරීන්ට විශේෂ උපදෙස් ලබා දී තිබේ.
