සීමිත මූල්‍ය සම්පත් තිබියදීත්, සංවර්ධන ප්‍රමුඛතා හා ජනතා අවශ්‍යතා සපුරාලීම සඳහා අයවැයෙන් ප්‍රතිපාදන වෙන්කර ඇති අතර, එම මුදල් නිසි ලෙස හා ඵලදායී අයුරින් යෙදවීම රාජ්‍ය නිලධාරීන්ගේ වගකීමක් බව ජනාධිපති අනුර කුමාර දිසානායක මහතා අවධාරණය කර තිබේ.
ජනාධිපති කාර්යාලයේදී පසුගියදා (25) පැවති අමාත්‍යාංශ ලේකම්වරුන් සමඟ සාකච්ඡාවේදී මෙම අදහස් ඉදිරිපත් කර ඇත.
ජනාධිපතිවරයා වැඩිදුරටත් මෙසේ අදහස් දක්වා ඇත:
- රාජ්‍ය නිලධාරීන් වියදම් කළමනාකරණයේදී වගවීමෙන් යුතුව කටයුතු කළ යුතුය
- රාජ්‍ය සේවය පිළිබඳව ජනතාව තුළ යහපත් ආකල්පයක් නොමැති අතර, එයට රාජ්‍ය සේවයේ අකාර්යක්ෂමතාව හේතුවී ඇත
- රාජ්‍ය සේවකයින්ගේ රැකියා අතෘප්තිකර බව ද මෙම අකාර්යක්ෂමතාවට හේතුවක් වී ඇත
- දේශපාලන අධිකාරිය වියදම් අඩු කර ඇති බැවින් රාජ්‍ය ආයතනවල ද පරිපාලන වියදම් අඩු කිරීම හා නාස්තිය වැළැක්වීම අවශ්‍ය වේ
රජයේ වියදම් අඩු කිරීම සඳහා පහත ක්‍රියාමාර්ග ගැනීමට සාකච්ඡා කර ඇත:
- රජයේ කාර්යාල සියල්ල රජයේ ගොඩනැගිලිවලට රැගෙන ඒම
- ඉහළ නඩත්තු වියදම් ඇති අමාත්‍යාංශ වාහන මාර්තු මාසය වන විට වෙන්දේසි කිරීම
- භාවිතයට නොගන්නා කාර්යාල උපකරණ ඉවත් කිරීම
- වසා දැමිය යුතු, ඒකාබද්ධ කළ යුතු හා පෞද්ගලික අංශයට පැවරිය යුතු ආයතන හඳුනාගැනීම
ජනාධිපති ලේකම් ආචාර්ය නන්දික සනත් කුමානායක, අගමැති ලේකම් ජී.පී සපුතන්ත්‍රී සහ අමාත්‍යාංශ ලේකම්වරු මෙම සාකච්ඡාවට සහභාගී වූ බව ජනාධිපති මාධ්‍ය අංශය වාර්තා කරයි.
