ජනාධිපති අනුර කුමාර දිසානායක මහතා පැවසුවේ, රට තුළ ජාතික ආරක්ෂාවට කිසිදු තර්ජනයක් නොමැති බවයි. ඔහු මේ බව අද (23) මහනුවර ශ්‍රී දළදා මාලිගාව වැඳපුදා ගැනීමෙන් අනතුරුව ප්‍රකාශ කළේය.
“ජාතික ආරක්ෂාව සඳහා කිසිදු තර්ජනයක් නොමැති අතර, මේ වන විට පාතාල කණ්ඩායම් අතර ගැටුම් මතුව තිබුණද, එය මහජන ආරක්ෂාවට ප්‍රධාන තර්ජනයක් වී නොමැති බව” ජනාධිපතිවරයා සඳහන් කළේය.
නමුත්, දිර්ඝ කාලයක් තුළ මෙම පාතාල කණ්ඩායම් විවිධ ක්ෂේත්‍රවලට හා ආයතනවලට පැතිරී ගොස් ඇති අතර, ඔවුන්ගේ සබඳතාවයන් විනාශකාරී ජාලයක් බවට පත්ව ඇති බවද ජනාධිපතිවරයා පැවසීය. එබැවින්, රජය මෙම ක්‍රියාකාරකම් මැඩපැවැත්වීමට දැඩි උත්සාහයක් ගන්නා බවත්, අදාළ පියවර ගැනීම සඳහා අවශ්‍ය තොරතුරු ලබාගෙන ඇති බවත් ඔහු සඳහන් කළේය.
“මේ පාතාල කණ්ඩායම් අතර ගැටුම් පමණක් නොවී, එම ක්‍රියා පිටුපස තවත් බලවේගයක් ක්‍රියාත්මක වෙමින් ඇතිද යන්න පිළිබඳ සැක සහ පරීක්ෂණ ද මේ වන විට ආරම්භ කර ඇත,” යැයිද ජනාධිපති දිසානායක මහතා වැඩිදුරටත් ප්‍රකාශ කළේය.
