බස් රථ ප්‍රවේශපත්‍ර සඳහා බැංකු කාඩ්පත් මගින් ගෙවීම් කිරීමේ සේවාව, ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායකගේ ප්‍රධානත්වයෙන් අද (24) පෙරවරුවේ මාකුඹුර බහුවිධ ප්‍රවාහන මධ්‍යස්ථානයේදී නිල වශයෙන් ආරම්භ විය.
මෙම අවස්ථාවට සමගාමීව, ජාතික ප්‍රවාහන වෛද්‍ය ආයතනය විසින් බස් රථ රියදුරන් මත්ද්‍රව්‍ය භාවිත කර ඇත්දැයි පරීක්ෂා කිරීමේ සෞඛ්‍ය පරීක්ෂණයක්ද සිදුකරන ලදී.
අද දිනයේදී මාකුඹුර සිට මාතර, ගාල්ල, බදුල්ල සහ කොළඹ සිට අම්පාර දක්වා ධාවනය වන අධිවේගී මාර්ග බස් රථ සඳහා මෙම කාඩ්පත් ගෙවීමේ ක්‍රමය හඳුන්වා දුන් බව අමාත්‍ය බිමල් රත්නායක මෙහිදී ප්‍රකාශ කළේය. මීට සමගාමීව, බස්නාහිර සහ ඌව පළාත්වල තෝරාගත් මාර්ග කිහිපයකද මෙම සේවාව ආරම්භ කර තිබේ. හෙට (25) දිනයේදී තවත් අධිවේගී මාර්ග කිහිපයක මෙම සේවාව ආරම්භ කිරීමට නියමිතය.
මේ අතර, මෙම වැඩසටහනට සමගාමීව කොස්වත්ත ප්‍රදේශයේ පැවති උත්සවයකදී අදහස් දැක්වූ බස්නාහිර පළාත් මාර්ගස්ථ මගී ප්‍රවාහන අධිකාරියේ සභාපති, විශ්‍රාමික කමාන්ඩර් ගාමිණී ජාසිංහ, එළඹෙන දෙසැම්බර් මාසය වන විට බස්නාහිර පළාතේ සියලුම අධිවේගී බස් රථ සඳහා මෙම ක්‍රමය හඳුන්වා දෙන බව පැවසීය.
“දෙසැම්බර් මාසයේදී අධිවේගී බස් රථ සඳහා මෙය ආරම්භ කර, ජනවාරි මාසයේදී සුඛෝපභෝගී බස් රථවලටත්, තෝරාගත් සාමාන්‍- බස් රථවලටත් හඳුන්වා දෙනවා. ලබන 2026 වසර අවසන් වන විට බස්නාහිර පළාතේ සියලුම බස් රථ සඳහා කාඩ්පත් මගින් ගෙවීමේ සේවාව සම්පූර්ණ කිරීමට අපි බලාපොරොත්තු වෙනවා,” යැයි ඔහු වැඩිදුරටත් කියා සිටියේය.
