සියලුම රාජ්‍ය ආයතන, පාසල්, විශ්වවිද්‍යාල සහ අධ්‍යාපන ආයතන තුළ “මත්ද්‍රව්‍ය නිවාරණ කමිටු” පිහිටුවීමට අදාළ චක්‍රලේඛයක් නිකුත් කරන බව මහජන ආරක්ෂක සහ පාර්ලිමේන්තු කටයුතු පිළිබඳ අමාත්‍ය ආනන්ද විජේපාල ප්‍රකාශ කළේය.
කළුතරදී පැවති උත්සවයකදී අදහස් දක්වමින් ඔහු මේ බව සඳහන් කළේය.
“සියලුම ආයතන ප්‍රධානීන්, තම ආයතනය මත්ද්‍රව්‍යවලින් තොර කලාපයක් බවට පත්කිරීමට වගබලා ගත යුතුයි. එය ඔවුන්ගේ වගකීමක්. ඇතැම් රාජ්‍ය ආයතනවල මත්ද්‍රව්‍යවලට ගොදුරු වූ පිරිස් සිටින බවට වාර්තා වී තිබෙනවා. එවැනි අය සිටීනම් ඔවුන් පුනරුත්ථාපනය කළ යුතුයි. ජාවාරම්කරුවන් සිටීනම්, විනය ක්‍රියාමාර්ග ගෙන පොලීසියට භාරදිය යුතුයි,” යැයි අමාත්‍යවරයා පැවසීය.
අධ්‍යාපන ලේකම්වරයා හරහා සියලුම අධ්‍යාපන ආයතන සඳහා මෙම චක්‍රලේඛය හෙට දිනයේදී නිකුත් කරන බවත්, මේවා හුදු සම්ප්‍රදායික කමිටු නොවිය යුතු බවත් ඔහු අවධාරණය කළේය. “ගුරුවරුන්, ශිෂ්‍ය නායක නායිකාවන් එක්ව සක්‍රීය කමිටු පිහිටුවිය යුතුයි. ඉහළම පාසලේ සිට ගම්බද පාසල් දක්වා දරුවන් මත්ද්‍රව්‍යවලට ඇබ්බැහි වී ඇති බවට තොරතුරු ලැබී තිබෙනවා,” යනුවෙන් ඔහු කියා සිටියේය.
මෙතෙක් පාසල් තුළ වැටලීම් සිදු නොකළද, අවශ්‍යතාවක් මතුවුවහොත් පාසල්වලට මත්ද්‍රව්‍ය පැමිණෙන මාර්ග වැටලීම සඳහා පොලිස් සුනඛයින්ගේ සහාය ලබා දෙන ලෙස පොලිස්පතිවරයාට දැනුම් දෙන බවද අමාත්‍යවරයා සඳහන් කළේය.
මීට අමතරව, ලියාපදිංචි රාජ්‍ය නොවන සංවිධාන 1200ක් මෙම මත්ද්‍රව්‍ය නිවාරණ වැඩපිළිවෙළට සම්බන්ධ කරගන්නා ලෙස ජනාධිපති ලේකම්වරයාට උපදෙස් දුන් බවද ආනන්ද විජේපාල වැඩිදුරටත් පැවසීය.
