“රටම එකට” ජාතික මත්ද්‍රව්‍ය මර්දන මෙහෙයුම යටතේ, ගතවූ පැය 24 තුළ දිවයින පුරා සිදුකළ වැටලීම්වලින් මත්ද්‍රව්‍ය සම්බන්ධ වැරදි සඳහා පුද්ගලයින් 1,284 දෙනෙකු අත්අඩංගුවට ගෙන තිබේ.
පොලීසිය පැවසුවේ, ඊයේ දිනයේදී වැටලීම් 1000ක් ක්‍රියාත්මක කළ බවත්, එම සැකකරුවන් සතුව තිබී හෙරොයින් කිලෝග්‍රෑම් 7කට අධික ප්‍රමාණයක් සහ අයිස් මත්ද්‍රව්‍ය කිලෝග්‍රෑම් 4.7කට අධික ප්‍රමාණයක් සොයාගත් බවත්ය. ඊට අමතරව, හෂීස්, ගංජා සහ මත්පෙති ඇතුළු තවත් මත්ද්‍රව්‍ය රැසක්ද පොලිස් භාරයට ගෙන තිබේ.
අත්අඩංගුවට ගත් සැකකරුවන්ගෙන් 16 දෙනෙකු රැඳවුම් නියෝග මත රඳවාගෙන ප්‍රශ්න කරන අතර, තවත් 15 දෙනෙකු පුනරුත්ථාපනය සඳහා යොමු කර ඇත.
ඒ අනුව, ඔක්තෝබර් මස 30 වනදා මෙම “රටම එකට” ජාතික මෙහෙයුම ආරම්භ කළ දින සිට මේ දක්වා ගතවූ දින 10ක පමණ කාලය තුළ, මත්ද්‍රව්‍ය සම්බන්ධ වැරදි සඳහා අත්අඩංගුවට ගත් මුළු පුද්ගලයින් සංඛ්‍යාව 12,000 ඉක්මවා ඇති බව පොලීසිය වැඩිදුරටත් සඳහන් කරයි.
