ප්‍රකට ව්‍යාපාරික සජීව් රාජපුත්‍ර මහතා, ජනාධිපතිතුමා ඇතුළු මාළිමා නායකයින්ගේ මෑතකාලීන ජපන් සංචාරය සඳහා තමන් මුදල් සැපයූ බවට සමාජ මාධ්‍ය ඔස්සේ සංසරණය වන චෝදනා තරයේ ප්‍රතික්ෂේප කරයි. ප්‍රකට සහල් මෝල් හිමි ව්‍යාපාරික ඩඩ්ලි සිරිසේන මහතාගේ බෑණා වන ඒ මහතා, මෙම චෝදනා පදනම් විරහිත සහ නොමඟ යවන සුළු ඒවා බව පෙන්වා දෙයි.
ජපානයේ සිට වීඩියෝ ප්‍රකාශයක් නිකුත් කරමින් ඔහු මේ බව සඳහන් කළේ, විමල් වීරවංශ මහතා විසින් කරන ලද ප්‍රකාශයක් ඇතුළත් වීඩියෝවකට ප්‍රතිචාර දක්වමිනි.
“ඩඩ්ලි සිරිසේන මහතාට මගේ ඇති නෑදෑකම පෙන්වා දෙමින්, ‘හාල් සල්ලි’ වලින් මෙම සංචාරයට මම මුදල් යෙදවූ බවට චෝදනාවක් එල්ල වන වීඩියෝ පටයක් මා දුටුවා,” යැයි සජීව් රාජපුත්‍ර මහතා පැවසීය. “මෙය සම්පූර්ණයෙන්ම අසත්‍යයක්. මම හාල් ව්‍යාපාරයේ නිරත වන්නේ නැහැ. මගේ ප්‍රධාන ව්‍යාපාරය වන්නේ වසර 30කට අධික කාලයක් පුරා මා නිරත වන ජපානයේ සිට වාහන අපනයනය කිරීමයි.”
ජනාධිපතිවරයාගේ නිල සංචාරය සිදුවන අවස්ථාවේදීම තමන් සිටියේ ලංකාවේ බවද ඔහු පැහැදිලි කළේය.
තමන් විසින් පෞද්ගලිකව අනුග්‍රහය දැක්වූ ගෝලීය ශ්‍රී ලාංකික ව්‍යාපාරික සභා සම්මේලනයේ (Global Federation of Sri Lankan Business Councils) සමුළුව පිළිබඳව ඔහු කරුණු පැහැදිලි කළ ඔහු, “එම සමුළුවේ සම්පූර්ණ වියදම වන රුපියල් මිලියන 10කට අධික මුදල, කිසිදු වෙනත් අනුග්‍රාහකයෙකු නොමැතිව, මගේ පෞද්ගලික ව්‍යාපාරික මුදල්වලින් දරනු ලැබුවා,” යි ඔහු අවධාරණය කළේය.
අවසාන වශයෙන්, පදනම් විරහිත චෝදනා සහ දේශපාලන අරමුණු සහිත කටකතා විවේචනාත්මකව විමසා බලන ලෙස සජීව් රාජපුත්‍ර මහතා මහජනතාවගෙන් ඉල්ලා සිටියේය.
“මගේ මුදල් වියදම් කිරීමට මට කිසිවෙකුගෙන් අවසර අවශ්‍ය නැහැ. මම මේ දේවල් කළේ රටට සේවයක් කිරීමේ අරමුණින්,” යැයි පවසමින් ඔහු එම චෝදනා බැහැර කළේය.
