කොළොන්නාව ගංවතුර පාලනය සඳහා නිර්දේශ ලබාදීමට පත් කළ කමිටුව ඉදිරිපත් කළ වාර්තාවේ ඇතුළත් කොළොන්නාව ගංවතුර පාලනය කිරීම සඳහා වූ නිර්දේශ සහ ඒ අනුව ගත හැකි ක්‍රියාමාර්ග පිළිබදව සාකච්ඡාවක් ඊයේ (04) පවත්වා තිබේ.
අගමැති හරිනි අමරසූරියගේ ප්‍රධානත්වයෙන් කොළඹ දිස්ත්‍රික් ලේකම් කාර්යාලයේ පැවැති එම සාකච්ඡාවට කොළඹ දිස්ත්‍රික් සම්බන්ධීකරණ කමිටු සභාපති, කොළඹ දිස්ත්‍රික් පාර්ලිමේන්තු මන්ත්‍රී ලක්ෂ්මන් නිපුනාරච්චි හා කොළොන්නාව සම්බන්ධීකරණ කමිටු සභාපති, තරුණ කටයුතු නියෝජ්‍ය අමාත්‍ය එරංග ගුණසේකර සහභාගී වී ඇත.
කොළොන්නාව වාර්තාවෙන් ලබා දී ඇති නිර්දේශ ක්‍රියත්මක කරමින්, ඊට අදාළ ක්‍රියාමාර්ග ගන්නා ලෙස නිලධාරීන්ට දැනුම් දී ඇති අතර, මීලඟ කොළඹ දිස්ත්‍රික් සම්බන්ධීකරණ කමිටු රැස්වීමේ දී එම ක්‍රියාමාර්ග ගැනීම සහ නිර්දේශ ක්‍රියාත්මක කිරීමේ ප්‍රගතිය පිළිබදව ඉදිරිපත් කරන ලෙසද අගමැති විසින් නිලධාරීන්ව දැනුවත් කර තිබේ.
ජාතික නිදහස් දිනය හේතුවෙන් රජයේ නිවාඩු දිනයක් වුවත් අද (04) පැවති මෙම සාකච්ඡාව වෙනුවෙන් ඊට අදාළ ආයතනවල, වගකීම් දරන රාජ්‍ය නිලධාරීන් පැමිණ සිට ඇත. පැය 03කට අධික කාලයක් පැවති මෙම සාකච්ඡාවේ දී කොළොන්නාව ගංවතුර පාලනය සඳහා වන සැලසුම්, යෝජනා හා අදහස්ද ඉදිරිපත් කර තිබේ.
එම සියලු අදහස් හා යෝජනා අතරින් සාධනීය යෝජනාද එක් කරගනිමින් කොළොන්නාව ගංවතුර පාලනය කිරීම වෙනුවෙන් පියවර ගැනීම ප්‍රමුඛතාවය ලබාදිය යුතු කාර්‍යයක් බව අගමැති හරිනි අමරසූරිය මෙහි දී සඳහන් කර ඇත.
නිදහස් දිනය වෙනුවෙන් ලබාදී ඇති රජයේ නිවාඩු දිනයද කැපකරමින් මෙම සාකච්ඡාව සඳහා පැමිණීම පිළිබදව අගමැති විසින් පැමිණ සිටි රාජ්‍ය නිලධාරීන්ට සිය ස්තූතියද මෙහි දී පළ කර තිබේ.
මෙම සාකච්ඡාවට දිස්ත්‍රික් ලේකම්වරයා, කොළොන්නාව ප්‍රාදේශීය ලේකම් ඇතුළු ජල සම්පාදන මණ්ඩලය, ඉඩම් ඉඩම් ගොඩ කිරීමේ දෙපාර්තමේන්තුව, ප්‍රාදේශීය ලේකම් කාර්යාලය, නාගරික සංවර්ධන අධිකාරිය යන ආයතනවල නිලධාරීන් සහ කොළොන්නාව, ගොතටුව පොලිස් ස්ථානාධිපතිවරුන් එක්ව සිට ඇත.
