පාර්ලිමේන්තුවේ භෝජනාගාරයෙන් මන්ත්රීලවරුන්ට ලබාදෙන ආහාර පාන සඳහා පිරිවැය ආවරණය කිරීමේ මිල ගණන් නියම කිරීමට “ගෘහ කාරක සභාව” ගෙන ඇති තීරණය ඉවතලා අඩු මිලට ලබා ගැනීමේ උපක්‍රමයක් සමගි ජන බලවේගය දියත් කර තිබේ.
එම උපක්‍රමය ප්‍රසිද්ධියේ හෙළිවී තිබෙන්නේ එම පක්ෂයේ පාර්ලිමේන්තු මන්ත්‍රී මුජිබර් රහුමාන් රූපවාහිනී සංවාදයක් අතර, කරන ලද ප්‍රකාශයකින් ය. මන්ත්‍රීවරයා ප්‍රකාශ කළේ “දැනට පාර්ලිමේන්තුවේ මන්ත්‍රී කෙනෙක් දවල් කෑම කනවා නම්, රුපියල් 300/-ක් අය කරනවා. දැන් ආණ්ඩුව යෝජනා කර තිබෙනවා 1200/-ක් වගේ ප්‍රමාණයක් දාන්ඩ. මගේ පෞද්ගලික හැඟීම නම් ඒ පාර්ලිමේන්තු මන්ත්‍රීවරුන්ට තිබෙන බුෆේ එක රුපියල් 1200/-ක් වටින්නේ නැහැ. මගේ ගණන් අනුව නම් ඕක රුපියල් 700/-ක් – 800/-ක් වගේ ප්‍රමාණයකට ඒක වටිනවා” යනුවෙනි.
මෙම ප්‍රකාශනයෙන් පැහැදිලිවම දැක්වෙන්නේ පිරිවැය ආවරණය කිරීමේ පදනම මත නිර්දේශ කර තිබෙන දහවල් ආහාර වේලක මිල රුපියල් 700/-ක් හෝ 800/-ක් දක්වා අඩු කළ යුතු බවය.
මන්ත්‍රීවරුන්ට මේ වන විට දහවල් ආහාර වේලක් ලබා දෙන්නේ රුපියල් 300/-කට වන අතර, එය රුපියල් 1200/-ක් දක්වා ඉහළ දැමීමට තීරණය කර ඇත. එසේම උදේ ආහාර වේලක් රුපියල් 100/-කට ලබා දෙන අතර, එය රුපියල් 600/-දක්වා වැඩි කිරීමට යෝජනා කර ඇත. එමෙන්ම කිරි තේ එකක් රුපියල් 50/- සිට රුපියල් 200/- දක්වා වැඩ කිරීමට ද නිර්දේශ කර ඇත.
පසුගිය ජනාධිපතිවරණයේදී සහ මහා මැතිවරණයේදී ජාතික ජන බලවේගය ජනතාවට ලබාදුන් පොරොන්දුවක් ඉටුකරමින් අසීමිත මන්ත්‍රී වරප්‍රසාද ඉවත් කිරීමේ එක් ක්‍රියාදාමයක් ලෙස පාර්ලිමේන්තුවේ භෝජනාගාරයේ ආහාර පාණවල මිල ගණන් මේ ආකාරයෙන් සංශෝධනය කර තිබේ.
