රනිල් වික්‍රමසිංහගේ නායකත්වයෙන් යුත් එක්සත් ජාතික පක්ෂය සමග සන්ධානගත වීමට සමගි ජන බලවේගයේ නායක සජිත් ප්‍රේමදාස තීරණය කර ඇති බව, එම පක්ෂයේ මහ ලේකම් රංජිත් මද්දුමබණ්ඩාර ප්‍රකාශ කර තිබේ.
මෙම හෙළිදරව්ව සිදුවන්නේ, පක්ෂ දෙක අතර සන්ධානගත වීමක් සඳහා සාකච්ඡා පැවැත්වෙමින් තිබියදී, රනිල් වික්‍රමසිංහ, නාමල් රාජපක්ෂ සමග එක්ව “පොදු විපක්ෂය” නමින් වෙනම සන්ධානයක් පිහිටුවා ගැනීමෙන් අනතුරුවය. එම “පොදු විපක්ෂය” විසින් පසුගිය 21 වනදා නුගේගොඩදී පැවැත්වූ රැලිය අසාර්ථක වූ බවට විචාරකයින් කරුණු දක්වා ඇති පසුබිමක, සජිත් ප්‍රේමදාස නැවත රනිල් වික්‍රමසිංහ සමග එක්වීමට උත්සාහ දැරීම දේශපාලනික වශයෙන් සුවිශේෂී සිදුවීමකි.
එක්සත් ජාතික පක්ෂය සහ සමගි ජන බලවේගය අතර නායක මට්ටමේ සාකච්ඡා කඩිනමින් ආරම්භ වන බව රංජිත් මද්දුමබණ්ඩාර පවසා ඇත. ඊයේ (23) සමගි ජන බලවේගයේ නව ආසන සංවිධායකවරුන් පත්කිරීමෙන් අනතුරුව, ඔහු ප්‍රථම වරට මෙම නායක මට්ටමේ සාකච්ඡා පිළිබඳව මාධ්‍යයට හෙළි කර තිබේ.
මීට පෙර, රනිල් වික්‍රමසිංහ සහ සජිත් ප්‍රේමදාස අතර පැවති නායකත්ව අර්බුදය හේතුවෙන් එක්සත් ජාතික පක්ෂය දෙකඩ වී, සමගි ජන බලවේගය බිහි වූ බව සිහිපත් කළ යුතුය.
