නීත්‍යානුකූල වැටලීමක් සිදුකරන මුවාවෙන්, කොළඹ 11, හෙට්ටිවීදියේ පිහිටි රන් භාණ්ඩ අලෙවිසැල් දෙකකින් රුපියල් දස කෝටි විසි ලක්ෂයකට අධික මුදලක් කොල්ලකෑමේ සිද්ධියට සම්බන්ධ තවත් සුරාබදු කෝප්‍රල්වරුන් දෙදෙනෙකු අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබේ.
මෙම මහා පරිමාණ කොල්ලයට සම්බන්ධයෙන් මීට පෙර සුරාබදු පරීක්ෂකවරයෙකු සහ කෝප්‍රල්වරුන් සිව් දෙනෙකු අත්අඩංගුවට ගෙන රක්ෂිත බන්ධනාගාරගත කර තිබූ අතර, මෙම නව අත්අඩංගුවට ගැනීමත් සමග, සිද්ධියට සම්බන්ධ සුරාබදු නිලධාරීන් සංඛ්‍යාව 7 දක්වා ඉහළ යයි. අත්අඩංගුවට ගත් සියලුම නිලධාරීන්, සුරාබදු දෙපාර්තමේන්තුවේ ගොතටුව මත්ද්‍රව්‍ය කාර්යාංශයට අනුයුක්තව සේවය කළ අය වීම විශේෂත්වයකි.
මෙම සිද්ධියට මුල්වී ඇත්තේ, පසුගිය ජූනි මස 5 වනදා, නීති විරෝධීව ආනයනය කළ දුම්වැටි තොගයක් අත්අඩංගුවට ගන්නා මුවාවෙන් මෙම රන් අලෙවිසැල් දෙකට කඩා වැදුණු සැකකාර සුරාබදු නිලධාරීන් පිරිස, රුපියල් 102,000,000ක මුදලක් කොල්ලකා, එම ආයතනවල සේවකයින් 7 දෙනෙකු අත්අඩංගුවට ගෙන යාමයි.
පොලිස් විමර්ශනවලදී වැඩිදුරටත් අනාවරණය වී ඇත්තේ, අත්අඩංගුවට ගත් සේවකයින් 7 දෙනාගෙන් 4 දෙනෙකු පමණක් දුම්වැටි සමග අධිකරණයට ඉදිරිපත් කර, කොල්ලකන ලද මුදලින් රුපියල් කෝටි 5ක මුදලක් නැවතත් ඔවුන් වෙත ලබා දී ඇති බවයි.
