“පොදු විපක්ෂය” යනුවෙන් හඳුන්වන කණ්ඩායම සමග ලබන වසරේදී එක්වන බව සමගි ජන බලවේගයේ පාර්ලිමේන්තු මන්ත්‍රී රෝහණ බණ්ඩාර ප්‍රකාශ කර තිබේ.
ලබන 21 වනදා නුගේගොඩදී පැවැත්වෙන රැලියට එක්වීම පිළිබඳව අදහස් දක්වමින් ඔහු මෙම ප්‍රකාශය සිදුකර ඇත. මෙම ප්‍රකාශයත් සමග, සමගි ජන බලවේගය එම රැලිය මුල් කරගනිමින් මේ වන විටත් මුහුණ දී සිටින අභ්‍යන්තර බෙදීම තවදුරටත් තීව්‍ර වී තිබේ. මෑතකදී පැවති අයවැය ඡන්ද විමසීමේදීද, එම පක්ෂයේ මන්ත්‍රීවරුන් සිව් දෙනෙකු පක්ෂ තීරණයට පටහැනිව ඡන්දය ප්‍රකාශ කිරීම මගින් මෙම බෙදීම ප්‍රසිද්ධියේම මතු විය.
නාමල් රාජපක්ෂ සහ රනිල් වික්‍රමසිංහ මූලිකත්වය ගෙන පවත්වන මෙම රැලියට, සමගි ජන බලවේගයේ එක් කොටසක් සහභාගී වන බවත්, තවත් කොටසක් සහභාගී නොවන බවත්, තවත් පිරිසක් ආශීර්වාද කරන බවටත් ප්‍රකාශ නිකුත් කරමින්, පක්ෂයේ අභ්‍යන්තර බෙදීම් මේ වන විට මතුපිටට පැමිණ ඇත.
මෙවන් පසුබිමක් තුළ, රෝහණ බණ්ඩාරගේ මෙම ප්‍රකාශය, සමගි ජන බලවේගයේ ඉදිරි දේශපාලන ගමන් මග පිළිබඳව නව කතාබහක් නිර්මාණය කර තිබේ.
