විපක්ෂ නායක සජිත් ප්‍රේමදාසගේ ඉන්දීය නිල සංචාරය පිළිබඳව තමන් හෝ සමගි ජන බලවේග පක්ෂය දැනුවත් නොසිටි බවත්, තමන් ඒ පිළිබඳව දැනගත්තේ පුවත්පත් මාර්ගයෙන් බවත් පාර්ලිමේන්තු මන්ත්‍රී ආචාර්ය හර්ෂ ද සිල්වා ප්‍රකාශ කරයි.
‘හිරු සලකුණ’ රූපවාහිනී වැඩසටහනකට එක්වෙමින් ඔහු මෙම ආන්දෝලනාත්මක හෙළිදරව්ව සිදුකළේය.
මෙම සංචාරය නිල ආරාධනාවක් මත සිදුවූවක්දැයි මාධ්‍යවේදීන් නැගූ ප්‍රශ්නයකට පිළිතුරු දෙමින් හර්ෂ ද සිල්වා, “මං ඒක දන්නේ නෑ. මං විතරක් නෙවෙයි, පක්ෂය දන්නෙත් නෑ. අද පාර්ලිමේන්තුවේදීත් ආණ්ඩුව මේ කතාව කියලා මට සමච්චල් කළා. මං ගණන් ගත්තේ නෑ. අපිට කිව්වෙත් නෑ… දන්නෙත් නෑ… අපි දන්නෙත් පත්තරෙන්,” යනුවෙන් කියා සිටියේය.
සජිත් ප්‍රේමදාසගේ ඉන්දීය සංචාරය, හර්ෂ ද සිල්වාව සහභාගී කර නොගෙන, ඔහුගේ ආසනයේ නාගරික මන්ත්‍රීවරයෙකු ඊට සම්බන්ධ කරගැනීම පිළිබඳව පාර්ලිමේන්තුව තුළ සහ ඉන් පිටත දැඩි කතාබහක් නිර්මාණය වී ඇති පසුබිමක, මෙම ප්‍රකාශය සමගි ජන බලවේගය තුළ අභ්‍යන්තර මතභේදයක් නිර්මාණය වී ඇති බවට ඉඟි කරයි.
