ශ්‍රී ලංකාවට අයත් මුහුදු සීමාව තුළ නීති විරෝධී ලෙස ධීවර කටයුතුවල නිරතව සිටි ඉන්දීය ජාතික ධීවරයින් 14 දෙනෙකු නාවික හමුදාව විසින් අත්අඩංගුවට ගෙන තිබේ.
ශ්‍රී ලංකා නාවික හමුදාව සහ වෙරළාරක්ෂක දෙපාර්තමේන්තුව එක්ව ඊයේ (09) රාත්‍රියේ අනලතිව් දූපතට ඔබ්බෙන් වූ මුහුදු තීරයේ සිදුකළ විශේෂ සෝදිසි මෙහෙයුමකදී මෙම ධීවරයින් පිරිස අත්අඩංගුවට ගත් බව නාවික හමුදාව නිවේදනය කරයි.
අත්අඩංගුවට ගත් ධීවරයින් පැමිණි ට්‍රෝලර් යාත්‍රාව, ඔවුන් භාවිත කළ ධීවර ආම්පන්න සහ නීති විරෝධී ලෙස රැස්කරගෙන තිබූ ධීවර අස්වැන්නද නාවික හමුදා භාරයට ගෙන ඇත.
මෙලෙස අත්අඩංගුවට ගත් ධීවරයින් 14 දෙනා, ඉදිරි නීතිමය කටයුතු සඳහා යාපනය, මයිලඩි හි ධීවර පරීක්ෂක කාර්යාලය වෙත භාරදී ඇති බව නාවික හමුදාව වැඩිදුරටත් සඳහන් කරයි.
