“රටම එකට” ජාතික මෙහෙයුම යටතේ, පාසල් මට්ටමින් ක්‍රියාත්මක කරනු ලබන මත්ද්‍රව්‍ය සෝදිසි මෙහෙයුම් සහ පරීක්ෂා කිරීම් සඳහා පොලිස් නිල සුනඛයින්ගේ සහාය ලබාගැනීමට අවස්ථාව සලසා ඇති බව පොලිස් මාධ්‍ය කොට්ඨාසය දැනුම් දෙයි.
මත්ද්‍රව්‍ය උවදුර මුලිනුපුටා දැමීම සඳහා රජය විසින් ආරම්භ කර ඇති මෙම දීපව්‍යාප්ත වැඩසටහනට ශ්‍රී ලංකා පොලීසිය සෘජු දායකත්වයක් ලබා දෙන අතර, පාසල් දරුවන් ඉලක්ක කරගත් මත්ද්‍රව්‍ය ජාවාරම මැඩපැවැත්වීම සඳහා විශේෂ අවධානයක් යොමුකර තිබේ.
ඒ අනුව, යම් පාසලක මත්ද්‍රව්‍ය සෝදිසි මෙහෙයුමක් සඳහා පොලිස් නිල සුනඛයින්ගේ සහාය අවශ්‍ය වන්නේ නම්, අදාළ පාසලේ විදුහල්පති හෝ විදුහල්පතිනිය විසින් ශ්‍රී ලංකා පොලිසියේ නිල සුනඛ කොට්ඨාසයේ අධ්‍යක්ෂ වෙත සෘජුවම දැනුම් දී එම සහාය ලබා ගැනීමට හැකියාව පවතී.
ඒ සඳහා 071-8591816 හෝ 081-2233429 යන දුරකථන අංක ඔස්සේ පොලිස් නිල සුනඛ කොට්ඨාසයේ අධ්‍යක්ෂ සම්බන්ධ කරගත හැකි බවද පොලිස් මාධ්‍ය කොට්ඨාසය වැඩිදුරටත් සඳහන් කරයි.
