දකුණු පළාත, ශ්‍රී ලංකාවේ චිකාගෝව බවට පත්වෙමින් තිබේද? තංගල්ල ප්‍රදේශය කේන්ද්‍ර කරගනිමින් පැය කිහිපයක් තුළ වාර්තා වූ අභිරහස් මරණ තුනක්, සොයාගත් හෙරොයින් සහ අයිස් මත්ද්‍රව්‍ය කිලෝග්‍රෑම් 635කට අධික තොගය සහ T-56 ඇතුළු නවීන ගිනි අවි තොගය, දකුණේ පාතාලය භයානක ලෙස හිස ඔසවා ඇති බවට අනතුරු අඟවයි.
මෙම බිහිසුණු සිදුවීම් මාලාවේ ආරම්භය සනිටුහන් වූයේ අද (22) උදෑසන තංගල්ල, සීනිමෝදර ප්‍රදේශයේ අලුත්වැඩියා කරමින් තිබූ නිවසකින් සැකකටයුතු මළ සිරුරු දෙකක් හමුවීමත් සමගය. එම නිවසේ සිටි තවත් පුද්ගලයෙකු රෝහල්ගත කිරීමෙන් පසු මිය යාමත් සමග මරණ සංඛ්‍යාව තවදුරටත් ඉහළ ගියේය.
මෙම මරණ පිළිබඳ විමර්ශනය කරමින් සිටි පොලීසිය, එම නිවස ආසන්නයේ නවතා තිබූ ලොරි රථ දෙකක් පරීක්ෂා කිරීමේදී, . ඉන් එක් ලොරි රථයක්, කොමඩු ප්‍රවාහනය කරන මුවාවෙන් ඉතා සූක්ෂම ලෙස සකස් කර තිබූ අතර, එහි සඟවා තිබූ හෙරොයින් සහ අයිස් මත්ද්‍රව්‍ය කිලෝග්‍රෑම් 200කට අධික තොගයක් සහ T-56 ගිනි අවියක් ඇතුළු පිස්තෝල 05ක් සොයා ගැනීමට හැකිවූ බව දකුණු පළාත භාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත් මහතා පැවසීය. අනෙක් ලොරි රථයේ තිබී සොයාගත් මත්ද්‍රව්‍ය සමග, මෙහෙයුමේදී සොයාගත් මුළු මත්ද්‍රව්‍ය ප්‍රමාණය කිලෝග්‍රෑම් 635 ඉක්මවීය.
මෙය හුදකලා සිදුවීමක් නොවන බවට තවදුරටත් සාක්ෂි සපයමින්, මීට පෙර අත්අඩංගුවට ගත් සම්පත් මනම්පේරි සහ බැකෝ සමන් නැමැති සංවිධානාත්මක අපරාධකරුවන්ගෙන් ලද තොරතුරු මත, මිද්දෙණිය ප්‍රදේශයේ වළ දමා තිබූ තවත් ගිනි අවි සහ උණ්ඩ තොගයක් පොලීසිය විසින් සොයා ගන්නා ලදී. එමෙන්ම, වැලිගම ප්‍රදේශයේදී මාලදිවයින් ජාතිකයෙකු විසින් පවත්වාගෙන ගිය අයිස් මත්ද්‍රව්‍ය නිෂ්පාදනාගාරයක් ද වැටලීමට පොලීසිය සමත් විය.
මෙම සිදුවීම් දාමය මගින් පැහැදිලි වන්නේ දකුණු පළාත, ජාත්‍යන්තර මත්ද්‍රව්‍ය ජාවාරමේ සහ සංවිධානාත්මක අපරාධ කල්ලිවල ප්‍රබල මධ්‍යස්ථානයක් බවට පත්වෙමින් ඇති බවයි. තත්ත්වය පාලනය කිරීම සඳහා මහජන සහය පතන පොලීසිය, දකුණේ මත්ද්‍රව්‍ය ජාවාරම් පිළිබඳ තොරතුරු 071-8591992 යන දුරකථන අංකයට ලබාදෙන ලෙස ජනතාවගෙන් ඉල්ලා සිටී.
