රජයේ කටයුතු බිම් මට්ටමට ගෙන යාම සඳහා මෙවර පළාත් පාලන මැතිවරණයේදී ජාතික ජන බලවේගය ජයග්‍රහණය කරවිය යුතු බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා පවසයි.
ඒ අනුව රජය ආරම්භ කළ දේශපාලන සංස්කෘතියේ වෙනස බිම් මට්ටම දක්වා ගෙන යා යුතු යැයි බත්තරමුල්ල පැලවත්ත හි පිහිටි ජනතා විමුක්ති පෙරමුණේ ප්‍රධාන කාර්යාලයේ (21) පැවති මාධ්‍ය හමුවකට එක්වෙමින් ඔහු සඳහන් කළේය.
කොන්ත්‍රාත් ගන්නා මහජන නියෝජිතයෙක් වෙනුවට, සැබෑ මහජන නියෝජිතයෙක් නිර්මාණය කරගත යුතු බවද, ඒ සඳහා මාලිමාව ජයග්‍රහණය කරවිය යුතු බවද ඔහු එහිදී සඳහන් කළේය.
ජනාධිපතිවරණයේදී සහ මහ මැතිවරණයේදී ජනතාව ලබාදුන් ජයග්‍රහණය පළාත් පාලන මැතිවරණයේදීද ලබාදෙනු ඇති බවට විශ්වාස කරන බවත්, මෙවර පළාත් පාලන මැතිවරණය සඳහා ජාතික ජන බලවේගයෙන් හොඳ කණ්ඩායමක් ඉදිරිපත් කර ඇති බවත් මෙහිදී අදහස් දැක්වූ ජාතික ජන බලවේගයේ ලේකම් වෛද්‍ය නිහාල් අබේසිංහ සඳහන් කරයි.
මෙම මාධ්‍ය හමුව සඳහා විදේශ කටයුතු, විදේශ රැකියා සහ සංචාරක ඇමති විජිත හේරත් සහ පාර්ලිමේන්තු මන්ත්‍රී සමන්මලී ගුණසිංහද එක්වී සිටියහ.
