සමගි ජනබලවේගයේ සභාපති ඉම්තියාස් බාකිර් මාකාර් තමන් දැරූ සියලු තනතුරුවලින් ඉල්ලා අස්වීමට තිරණය කොට තිබේ.
මීට පෙර අවස්ථා දෙකකදී පක්ෂයේ ප්‍රතිසංවිධාන සහ ඉදිරි ගමන වෙනුවෙන් පිටු එකොළහකට වැඩි යෝජනාවලියක් සහ ඒ පිළිබඳව සිහිකැඳවමින් පිටු හතරක ලිපි ලියූ ඉම්තියාස් බාකිර් මාකර්, සිය ඉල්ලා අස්වීම වාක්‍ය හතරකින් ලියා විපක්ෂ නායක ලේකම් සුරංග රණසිංහ වෙන භාර දී ඇතැයි විපක්ෂ නායක කාර්යාලයේ ආරංචි මාර්ගවලින් කියවේ.
පක්ෂයේ අභිවෘද්ධිය වෙනුවෙන් සුවිශාල වෙහෙසක් දැරූ ඔහු සිය ඉල්ලා අස්වීමේ ලිපියෙන් කිසිවෙකුට කිසිදු චෝදනාවක් සිදුකර නැති අතර,තමන් වෙත පැවරූ වගකීම පිළිබඳව පක්ෂ නායකයාටත් සියලු පාක්ෂිකයින්ටත් සිය ස්තූතිය පුදකර ඇතැයි වාර්තා වෙයි.
දශක පහකට ආසන්න කාලයක් දේශපාලකයෙක් ලෙස ජනතා ගෞරවය දිනා සිටින ඉම්තියාස් බාකීර් මාකර් ශිෂ්‍ය සංගම් නායකයෙක්, මන්ත්‍රීවරයෙක් අමාත්‍යවරයෙක්, කැබිනට් අමාත්‍යවරයෙක්, පක්ෂ සභාපතිවරයෙක් ලෙස අත්දැකීම් බහුල චරිතයක් විය.
තමන් ඉදිරිපත්වන සෑම මැතිවරණයකදීම සුවිශාල ජන ප්‍රසාදයක් හිමිකරගත් හෙතෙම, ඒ සෑම මැතිවරණයකදීම සිය මනාප සහ පක්ෂයේ ඡන්ද වර්ධය කිරීමට සමත් විය. සමවාදී ශිෂ්‍ය පෙරමුණේ සභාපති ලෙසත්,බේරුවල සංවිධායක ලෙසත් ඉන් අනතුරුව මැතිවරණවලදීත් ඔහු ජයග්‍රහණය කළේ අතිවිශාල ඡන්ද ප්‍රතිශත ලබාගෙනයි.
2019 වසර අගදී එක්සත් ජාතික පක්ෂයෙන් ඉවත්ව අතිමහත් වූ මන්ත්‍රීවරු පිරිසක් සමඟ සමගි ජනබලවේගය නිර්මාණය කිරීමට කටයුතු කළ ප්‍රමුඛතමයෙක් වූ බාකිර් මාකර්, එය මෙරට ප්‍රධාන විපක්ෂය ලෙස ඔසවා තැබීමටත් සජිත් ප්‍රේමදාස විපක්ෂ නායකයා ලෙස පත්කිරීමටත් සාධනීය කාර්ය භාරයක් ඉටු කළේය.
පක්ෂ ප්‍රජාතන්ත්‍රවාදය වෙනුවෙන් මෙන්ම සමාජ ප්‍රජාතන්ත්‍රවාදය වෙනුවෙන් කැපවූ හෙතෙම ඒ වෙනුවෙන් නිරන්තර අරගල කළේය. ඉකුත් ජනාධිපතිවරණය සහ මහ මැතිවරණයට රටපුරා මහජන හමු වලට සහභාගී වූ හෙතෙම, ජාතික සමගිය වෙනුවෙන් පක්ෂයේ කැපවීම ප්‍රකට කළේය. කෙසේ වෙතත්, ජාතික ලයිස්තුවෙන් ඔහු පත් කරන බවට දී තිබූ පොරොන්දුව පක්ෂ නායකත්වය විසින් කඩකරනු ලැබීය.
එහෙත් ඒ පිළිබඳව එතරම් තැකීමක් නොකළ හෙතෙම පක්ෂයේ අභිවෘද්ධිය වෙනුවෙන් නිරත්තරයෙන්ම පෙනී සිටි අතර අවස්ථා කිහිපයකදීම පක්ෂයේ ඉදිරිගමන වෙනුවෙන් කළයුතු ප්‍රතිසංස්කරණ ලිඛිතව දැනුම් දෙන්නට ඔහු කටයුතු කළේය.
කෙසේ වෙතත්, පක්ෂය සහ නායකත්වය නිවැරදි මාවතට යොමු කිරීමට දීර්ඝකාලයක් තිස්සේ ගත් වෙහෙස අවසන්කොට ඉම්තියාස් බාකිර් මාකර් සියලු තනතුරුවලින් ඉල්ලා අස්වී තිබේ.
