ශ්‍රේෂ්ඨාධිකරණය අද (11) හිටපු ජනාධිපති මෛත්‍රිපාල සිරිසේන මහතා වෙත නොතීසි නිකුත් කර තිබේ. මෙම නොතීසි නිකුත් කිරීමට හේතුව වී ඇත්තේ රෝයල් පාක් ඝාතන සිද්ධිය සම්බන්ධයෙන් මරණීය දණ්ඩනය නියම වී සිටි ජූඩ් ශ්‍රමන්ත ජයමහට ලබා දුන් ජනාධිපති සමාව අහෝසි කිරීමට අදාළව වන්දියක් ගෙවන ලෙස අධිකරණය නියම කළ මුදල ගෙවීම පැහැර හැරීමයි.
අප්‍රේල් 29 වැනි දින අධිකරණය හමුවේ පෙනී සිට දඬුවම් නොකිරීමට හේතු දැක්විය යුතු බවට ශ්‍රේෂ්ඨාධිකරණය විසින් නොතීසි නිකුත් කර ඇත.
ඉකුත් වසරේ මෙම නඩුවේ තීන්දුව ප්‍රකාශ කළ අවස්ථාවේදී, මූලික මිනිස් අයිතිවාසිකම් උල්ලංඝනය කිරීම වෙනුවෙන් රුපියල් මිලියනයක වන්දියක් මාසයක් ඇතුළත ගෙවන ලෙස හිටපු ජනාධිපතිවරයාට ශ්‍රේෂ්ඨාධිකරණය නියෝග කර තිබිණි. අද පෙත්සම කැඳවූ අවස්ථාවේදී, පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා සඳහන් කර ඇත්තේ මෛත්‍රිපාල සිරිසේන මහතා විසින් මේ දක්වාත් එම වන්දි මුදල ගෙවා නොමැති බවයි. ඒ අනුව මෙම වන්දි ගෙවීම පැහැර හැරීම සම්බන්ධයෙන් අධිකරණය හමුවේ පෙනී සිට දඬුවම් නොකිරීමට හේතු දැක්වීමට මෛත්‍රිපාල සිරිසේන මහතාට නොතීසි නිකුත් කිරීමට අධිකරණය නියම කර ඇත.
