රට තුළ කිසිදු ඉන්ධන හිඟයක් නොමැති බව ලංකා ඛනිජතෙල් නීතිගත සංස්ථාව අවධාරණය කරමින් සිටී. සංස්ථාව නිකුත් කළ නිවේදනයකට අනුව, අද (01) දින තුළ මේ වන විට ඉන්ධන බවුසර් 2,924ක් කොලොන්නාව තෙල් ගබඩා සංකීර්ණයෙන් දිවයින පුරා බෙදාහැර ඇත.
ඉන්ධන බෙදාහැරීම පිළිබඳ සංඛ්‍යාත්මක තොරතුරු
ලංකා ඛනිජතෙල් නීතිගත සංස්ථාවේ සභාපති ඩී.ජේ. රාජකරුණා මහතා මෙම තත්ත්වය පිළිබඳව විස්තර කරමින්:
- CPC ආයතනයෙන් ලෝඩ් 1,696ක්
- IOC ආයතනයෙන් ලෝඩ් 471ක්
- Sinopec ආයතනයෙන් ලෝඩ් 391ක්
- RM Park ආයතනයෙන් ලෝඩ් 366ක්
මෙම මුළු ඉන්ධන ලෝඩ් 2,924 සඳහා මුදල් ගෙවා ඇති අතර, සාමාන්‍ය පරිදිම රට පුරා බෙදාහැරීම් කටයුතු සිදුකරමින් පවතින බව සභාපතිවරයා තහවුරු කර සිටියි.
සීමිත ප්‍රමාණයක බවුසර් කණ්ඩායමක් පමණක් අක්‍රියව සිටි බව පෙන්වා දේ
“කණ්ඩායමක් පමණයි මේ සිද්ධියට සම්බන්ධ. එයාලා කිව්වේ ඊයේ (28) රාත්‍රියේ සිට තෙල් ඇණවුම් කරන්නේ නැහැ කියලා. නමුත් අද උදේ 7 වෙනකොට ඒ අය ඇණවුම් කළා,” යැයි රාජකරුණා මහතා පවසා ඇත.
එමෙන්ම කොළොන්නාවට පැමිණ තිබූ බවුසර් 140ක් පමණ වූ අතර, ඉන් 60කට අධික ප්‍රමාණයක් දැනටමත් පිටත්ව ගොස් ඇති බවද සභාපතිවරයා සඳහන් කර සිටියි.
“කලබල වීමට හේතුවක් නැත”
“මේ තත්ත්වය හමුවේ රටේ ගැටළුවක් ඇතිවෙන්න කිසිම හේතුවක් නැහැ. රටේ ජනතාව කලබලවෙන්න කිසිම හේතුවක් නැහැ” යැයි ඛනිජතෙල් සංස්ථා සභාපතිවරයා අවධාරණය කර ඇත.
මේ අතර ඉන්ධන බවුසර් රථ රියදුරන්ද සඳහන් කරන්නේ අද දිනද සාමාන්‍ය පරිදි අදාළ පර්යන්තවලින් ඉන්ධන බවුසර් පිටත් වූ බවයි.
