මෝටර් රථ ප්‍රවාහන දෙපාර්තමේන්තුවෙන් ලබාගත් තොරතුරු අනුව, මුදල් අමාත්‍යාංශය නමින් ලියාපදිංචි කර ඇති වාහන 257න් වාහන 176ක භෞතික පැවැත්ම තහවුරු කර ගැනීමට නොහැකි වී ඇති බව ජාතික විගණන කාර්යාලය විසින් 2023 වර්ෂයට අදාළව නිකුත් කළ විගණන වාර්තාවෙන් හෙළි වී තිබේ.
එම වාහන 176 අතරින් වාහන 99ක් පිළිබඳව භෞතික පැවැත්ම ඇතුළු කිසිදු තොරතුරක් විගණනය වෙත ඉදිරිපත් කර නොමැති බවද වාර්තාවේ සඳහන් වෙයි.
විගණනය මගින් නිර්දේශ කර ඇත්තේ මුදල් අමාත්‍යාංශය නමින් ලියාපදිංචි වී ඇති සියලු වාහන පිළිබඳ භෞතික පැවැත්ම හා අයිතිය තහවුරු කර ගැනීමට කටයුතු කළ යුතු බවයි.
මේ පිළිබඳව මුදල් අමාත්‍යාංශයේ ප්‍රධාන ගණන් දීමේ නිලධාරියා විගණනයට දන්වා ඇත්තේ, මෙම අතුරුදන් වූ වාහන 176 සම්බන්ධයෙන් තොරතුරු සොයා ගැනීමට දැනටමත් කටයුතු කරමින් පවතින බවයි.
