අවසන් මැතිවරණයෙන් පසු ආණ්ඩුව ගැන ජනතා අනුමැතිය 2025 පෙබරවාරි ප්‍රතිඵලවලට අනුව සීඝ්‍රයෙන් ඉහළට ගොස් ඇති බව “වෙරිටේ රිසර්ච්” සිදුකරන ගැලප් ශෛලියේ ‘රට හිතන හැටි’ ජනමත විමසුමේ සමීක්ෂණයෙන් හෙළි වී තිබේ.
වෙරිටේ රිසර්ච් විසින් අද (23) එම තොරතුරු ඇතුළත් නිවේදනය ප්‍රසිද්ධ කර ඇත.
ඒ අනුව ආණ්ඩුව ගැන ජනතා අනුමැතිය 2024 වසරේ ජූලි මාසයේ එය 24%ක් වූ අතර මෙවර එය 62%ක් දක්වා ඉහළට ගොස් ඇති බව සඳහන් වේ.
ආර්ථික අර්බුදයෙන් පසු ප්‍රථම වරට ජනගහණයෙන් බහුතරයක් එනම් 55%ක් ශ්‍රී ලංකාවේ ආර්ථික තත්වය යහපත් අතට හැරෙමින් පවතින බව සිතන්නේ යැයි මෙම සමීක්ෂණයෙන් වැඩිදුරටත් අනාවරණයවී තිබේ.
කෙසේවුවත් සමස්තයක් වශයෙන් රටේ ආර්ථික තත්වය තවමත් දුර්වල මට්ටමක පවතින බව රටේ ජනගහණයෙන් 47%කගේ අදහස බවද එම වාර්තාවෙන් කියැවෙන බවද එම නිවේදනයේ සඳහන් වේ.
එහෙකත් එය, 2024 ජූලි මාසයේ වාර්තා වූ 71%ක ප්‍රතිශතයට වඩා විශාල අඩු අගයකි.
සමස්තයක් වශයෙන් ගත්විට ආණ්ඩුව වැඩකරන ආකාරය අනුමත නොකරන ජනතාවගේ ප්‍රතිශතය 60%ක සිට 16%ක් දක්වා අගයන් 44කින් අඩුව ඇත.
තවද, ආර්ථිකය නරක අතට හැරෙමින් පවතින්නේ යැයි සිතන ජනතාවගේ ප්‍රතිශතයද, 65%ක සිට 14%ක් දක්වා අගයන් 51කින් අඩුව ඇත.
