ශ්‍රී ලංකාවේ සංවිධානාත්මක අපරාධ කණ්ඩායම් 57ක් සහ ඔවුන්ගේ අනුගාමිකයින් 1,400ක් ක්‍රියාත්මක බව බුද්ධි තොරතුරු අනුව හෙළිවී ඇති අතර, ඔවුන්ට එරෙහි විමර්ශන ක්‍රියාත්මක බව වැඩබලන පොලිස්පති ප්‍රියන්ත වීරසූරිය මහතා අනාවරණය කළේය.
ඔහු මේ බව ප්‍රකාශ කළේ, අද (22) පෙරවරුවේ රජයේ ප්‍රවෘත්ති දෙපාර්තමේන්තුවේදී පැවති මාධ්‍ය හමුවේදීය.
වසරේ මේ දක්වා කාලය තුළ ඝාතන සිද්ධීන් 22ක් වාර්තා වී ඇති අතර, ඒ අතර වෙඩිතැබීමේ සිද්ධීන් 17ක් සහ තියුණු ආයුධවලින් පහරදීම් 5ක් ඇති බව වැඩබලන පොලිස්පතිවරයා සඳහන් කළේය.
අපරාධ වැඩි වශයෙන් වාර්තා වන ප්‍රදේශ ලෙස බස්නාහිර සහ දකුණු පළාත් හඳුනාගෙන ඇති අතර, එම ප්‍රදේශවල ආරක්ෂාව තද කර ඇති බවද ඔහු පැවසීය.
එමෙන්ම, විදේශගතව සිටි අපරාධකරුවන් 19 දෙනෙකු පසුගිය කාලයේදී ශ්‍රී ලංකාවට රැගෙන ආ බවත්, නීතිය ක්‍රියාත්මක කිරීමේ මෙහෙයුම් තවදුරටත් දිගහැරෙන බවත් වැඩබලන පොලිස්පතිවරයා අනාවරණය කළේය.
