ගෝඨාභය රාජපක්ෂ ආරක්ෂක අමාත්‍යාංශයේ ලේකම් ලෙස සේවය කළ සමයේ, බත්තරමුල්ල අකුරේගොඩ ප්‍රදේශයේ නව හමුදා මූලස්ථානයේ ඉදිකිරීම් ආරම්භ කළේය. එමඟින් වසර 12කට වඩා දිගු කාලයක් ගතවූවද, මෙතෙක් ඉදිකිරීම් අවසන් කර ගැනීමට නොහැකිව ඇත.
මෙම තත්ත්වය මධ්‍යයේ, ජනාධිපති අනුර කුමාර දිසානායක විසින් පසුගිය 17 වනදා ඉදිරිපත් කළ අයවැය ලේඛනයේ, මෙම ඉදිකිරීම් අවසන් කිරීමට රුපියල් කෝටි 500ක් වෙන්කර ඇත. මෙතෙක් එම ගොඩනැගිලි සඳහා වැය කර ඇති මුළු මුදල රුපියල් කෝටි 3,000 ඉක්මවා ඇති බව විවිධ මූලාශ්‍ර අනුව හෙළිවූවත්, නිශ්චිත සංඛ්‍යාව මෙතෙක් අනාවරණය වී නොමැත.
මේ ඉදිකිරීම් ආරම්භ කර ඇත්තේ, ගෝඨාභය රාජපක්ෂ සහ එවකට ජනාධිපති මහින්ද රාජපක්ෂ යටතේය. මීට පෙර, ගාලු මුවදොර පිහිටා තිබූ පරණ හමුදා මූලස්ථානය අඩු මුදලකට විකුණා දැමූ පසු, අකුරේගොඩ ප්‍රදේශයේ නව මූලස්ථානයක් ඉදි කිරීමට තීරණය කරන ලදී.
