විපක්ෂ නායක සජිත් ප්‍රේමදාස පාර්ලිමේන්තුවේ 27/2 ප්‍රශ්නයක් ඉදිරිපත් කිරීමට නියමිතව තිබියදී එය නොවිමසා අගමැති ආචාර්ය හරිනි අමරසූරියගෙන් වෙනත් ප්‍රශ්නයක් විමසීමට ගොස් කාලය ගත කිරීමේදී අදාළ ප්‍රශ්න ඉදිරිපත් කරන්නැයි අවවාද කළ නියෝජ්‍ය කථානායක වෛද්‍ය රිස්වි සාලිට සිදු කළ තර්ජනයක් සම්බන්ධයෙන් පාර්ලිමේන්තුවේ ඇති වූ උණුසුම් කාරී තත්වය හමුවේ නියෝජ්‍ය කථානායකගෙන් සමාව ගැනීමට විපක්ෂ නායක සජිත් ප්‍රේමදාස කටයුතු කර තිබේ.
කාලය ගත නොකර අදාළ 27/2 ප්‍රශ්නය ඉදිරිපත් කරන්නැයි මූලාසනයේ සිටි නියෝජ්‍ය කථානායක වෛද්‍ය රිස්වි සාලි අවවාද කරන විට ඊට ප්‍රතිචාර දක්වමින් විපක්ෂ නායක සජිත් ප්‍රේමදාස සඳහන් කළේ “කරුණා කරලා විනාඩියක් දෙන්න මැදට පනින්නැතුව” යනුවෙනි.
එම අවස්ථාවේ නැගී සිටි සභානායක ඇමති බිමල් රත්නායක ඊට විරෝධය දක්වමින් මූලාසනයට තර්ජනය කිරීම හෙළා දකින බවත් වහාම එම තර්ජනය කිරීම ඉල්ලා අස් කරගෙන නියෝජ්‍ය කථානායකගෙන් සමාව ගතයුතු බවත් අවධාරණය කළේය.
ඒ සම්බන්දයෙන් දැඩි උණුසුම්කාරී තත්වයක් ඇති වූ අතර මූලාසනයේ සිටි නියෝජ්‍ය කථානායක, විපක්ෂනායකගේ තර්ජනය කිරීම් සම්බන්ධයෙන් අප්‍රසාදය පල කළේය. ඉන් පසු විපක්ෂ නායක සජිත් ප්‍රේමදාස මූලාසනයෙන් සමාව ඉල්ලා සිටි අතර තමන් සිදු කළ ප්‍රකාශය ඉල්ලා අස් කරගෙන තිබේ.
