මහින්ද රාජපක්ෂ පවුලේ සමීපතමයෙකු ලෙස සිට අනුප්‍රාප්තික ජනාධිපති රනිල් වික්‍රමසිංහගේ අතිශය විශ්වාසවන්ත දේශපාලඥයෙකු ලෙසින් ක්‍රියා කළ ප්‍රසන්න රණතුංග මේ වනවිට සම්පූර්ණයෙන් ම සියළු පාර්ශව වෙතින් ප්‍රතික්ෂේප වී ඇති බව වාර්තා වේ.
එක්සත් ජාතික පක්ෂය, ශ්‍රී ලංකා පොදු පෙරමුණ සහ ගොඩ නැගීමට උත්සාහ කරන දේශපාලන සන්ධානය ද ප්‍රසන්න රණතුංගව පිටමන් කර ඇත. පසුගිය මහ මැතිවරණයෙන් පසුව ඔහු විවිධ අවස්ථාවලදී විවිධ දේශපාලඥයන් සමඟ මෙන් ම පක්ෂ සහ සංවිධාන සමඟ ද එක් වීමට ප්‍රබල උත්සාහයක් ගෙන තිබිණි.
මේ අතර මීතොටමුල්ල ප්‍රදේශයේ ඉඩමක් ගොඩ කිරීම සඳහා අවසර ලබාදීම වෙනුවෙන් රුපියල් හය කෝටි පනස් ලක්ෂයක් ඉල්ලීම සම්බන්ධ නඩු විභාගයේදී කොළඹ මහාධිකරණය විසින් වැරදිකරු බවට තීන්දු කර තිබේ.
එම තීන්දුවට එරෙහිව අභියාචනාධිකරණයට ඇපෑලක් ඉදිරිපත් කර ඇති අතර එය ලබන ජූනි මස 5, 13 සහ 16 දිනවල විභාගයට ගැනීමට පංච පුද්ගල අභියාචනාධිකරණ විනිසුරු මඩුල්ල ඊයේ (29) තීරණ කර තිබේ.
