පොලිස් නිලධාරීන් අනවශ්‍ය ලෙස බස් රථවලට කඩා පැන අඛණ්ඩව සිදුකරන හිරිහැරවලට එරෙහිව දැවැන්ත වැඩ වර්ජනයක් දියත් කිරීමට පුද්ගලික බස් රථ රියදුරු සංගම් තීරණය කර තිබෙනවා. මේ සම්බන්ධයෙන් පෞද්ගලික බස් රථ හිමියන්ගේ සංගමයේ සභාපති ගැමුණු විජේරත්නගෙන් කළ විමසුමකදී ඔහු කියා සිටියේ, රියදුරන් වැඩ වර්ජනයකට යනවා නම් එය නැවැත්විය නොහැකි බවයි. බස් රථවල සවිකර ඇති අමතර උපාංග ඉවත් කිරීම සහ අනෙකුත් කරුණු රැසක් සම්බන්ධයෙන් පොලිසියේ අනිසි මැදිහත්වීම ගැන බස් රථ රියදුරන් සහ රිය සහායකයින් දැඩි කලකිරීමෙන් පසු වන බවද පෞද්ගලික බස් රථ හිමියන්ගේ සංගමයේ සභාපතිවරයා පවසනවා.
පොලිසියේ අනිසි මැදිහත්වීම නිසා උද්ගතව ඇති අර්බුදකාරී තත්ත්වය සම්බන්ධව ඉදිරි දින කිහිපය තුළ පොලිස්පතිවරයා සමග සාකච්ඡා කිරීමට බස් රථ හිමියන්ගේ සංගමයද සූදානමින් සිටින බවත් එහිදී තිරසර විසඳුමක් නොලැබුණොත් වැඩ වර්ජනයක් දියත් කිරීම හැර වෙනත් විකල්පයක් නොමැති බව වැඩිදුරටත් කියා සිටියා. ලංකා පුද්ගලික බස්රථ හිමියන්ගේ සංගමයේ සභාපති ගැමුණු විජේරත්න සඳහන් කරන්නේ, මෝටර් රථ ආඥා පනත අනුව සියල්ල සිදු විය යුතු අතර ඊට පරිභාහිරව පොලිසියට හෝ කිසිවකුට ක්‍රියා කිරීමට නොහැකි බවයි.
