ආණ්ඩුක්‍රම ව්‍යවස්ථාව, ස්ථාවර නියෝග ඇතුළු අත්‍යවශ්‍ය ලේඛන සියල්ල බ්‍රේල් ක්‍රමයට සකස් කිරීමට පාර්ලිමේන්තුව තීරණය කර තිබේ.
මෙම තීරණය ගෙන ඇත්තේ දෘශ්‍යාබාධිත තැනැත්තකු වන සුගත් වසන්ත ද සිල්වා පාර්ලිමේන්තු මන්ත්‍රිවරයකු ලෙස පත් කිරීම නිසා ය.
පාර්ලිමේන්තුවේ එදිනෙදා සම්මත කරන පනත් කෙටුම්පත් සියල්ල ද එම ක්‍රමයට සකස් කෙරේ.
මෙම ලේඛන සියල්ල බ්‍රේල් ක්‍රමයට සකස් කිරීම සඳහා සැලකිය යුතු කාලයක් ගත වන බවත් එය කළ හැකි ආකාරය සම්බන්ධයෙන් දැනටම උපදෙස් ලබා ගනිමින් සිටින බවත් මේ පිළිබඳ අප කළ විමසුමකට පිළිතුරු දුන් පාර්ලිමේන්තුවේ නියෝජ්‍ය මහලේකම් චමින්ද කුලරත්න සඳහන් කළේය.
එවැනි ලේඛන පරිශීලනයට අවස්ථාව ලබා ගැනීම දෘශ්‍යාබාධිත මන්ත්‍රිවරයාගේ අයිතියක් බවත් මෙම කටයුතු සම්බන්ධයෙන් ගත යුතු පියවර පාර්ලිමේන්තු කටයුතු පිළිබඳ කාරක සභාව සාකච්ඡා කිරීමට නියමිත බවත් නියෝජ්‍ය මහලේකම්වරයා සඳහන් කළේය.
මෙම මන්ත්‍රිවරයාගේ ඉල්ලීම මත පාර්ලිමේන්තු සභා ගර්භයට ඇතුළු වන ස්ථානයේම ආසනයක් වෙන් කෙරෙන අතර මන්ත්‍රිවරයා වෙනුවෙන් පාර්ලිමේන්තු කාර්ය මණ්ඩල සාමාජිකයෙක් ද වෙන් කෙරේ. ඉදිරිපත් කෙරෙන ලේඛන සම්බන්ධයෙන් මන්ත්‍රිවරයා දැනුවත් කිරීම එම සාමාජිකයාට පැවරී තිබේ.
