අමාත්‍ය සුනිල් හඳුන්නෙත්ති සිදු කළ දුරකතන සංවාදයක් විකෘති කරමින් නිර්මාණය කළ ව්‍යාජ හඬ පටයක් සමාජ මාධ්‍ය ඔස්සේ ප්‍රචාරය කිරීමේ සංවිධානාත්මක ජාවාරමක් පිළිබඳ තොරතුරු අනාවරණය වී තිබේ. මෙම සිද්ධිය සම්බන්ධයෙන් අමාත්‍යවරයා ඊයේ (26) අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කළේය.
මෙම ජාවාරම මෙහෙයවා ඇත්තේ ‘United Nations Human Rights Organization’ යනුවෙන් හඳුන්වා ගන්නා ව්‍යාජ සංවිධානයක් පිහිටුවා ගත් පුද්ගලයෙකු විසිනි. මොහු පරිත්‍යාගයක් ලෙස හුවා දක්වමින් ඉන්දියාවේ සිට ආනයනය කරන ලද සහල් කිලෝ ග්‍රෑම් 130,000ක තොගයක් රේගු බදු රහිතව නිදහස් කර ගැනීම සඳහා අමාත්‍යවරයාගේ සහාය ඉල්ලා තිබේ.
කෙසේ වෙතත්, රේගු නීති උල්ලංඝනය කරමින් බදු සහන ලබා දිය නොහැකි බව අමාත්‍යවරයා විසින් දැඩිව ප්‍රකාශ කිරීමත් සමඟ, ඊට පළිගැනීමක් ලෙස මෙම විකෘති කළ හඬ පටය සමාජ මාධ්‍ය වෙත මුදා හැර ඇති බව හෙළි වී ඇත. අදාළ ජාවාරම්කරු සහ ඔහුගේ ක්‍රියාකලාපය සම්බන්ධයෙන් විගණකාධිපතිවරයා විසින් නිකුත් කළ රේගු දෙපාර්තමේන්තුව පිළිබඳ වාර්තාවක ද මීට පෙර කරුණු සඳහන්ව තිබිණි.
