ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ ලබන පෙබරවාරි 25 වැනිදා එක්සත් රාජධානියේ ඔක්ස්ෆර්ඩ් (Oxford Union) සහ කේම්බ්රිජ් (Cambridge Union) ශිෂ්ය සංගම් ඇමතීමට නියමිතව ඇති අතර, ඊට එරෙහිව බ්රිතාන්යයේ දෙමළ තරුණ හා ශිෂ්ය සංවිධාන දැඩි විරෝධයක් පළ කර තිබේ.
එක්සත් රාජධානියේ විශ්වවිද්යාල 20කට අධික සංඛ්යාවක දෙමළ ශිෂ්ය සංගම් සහ බ්රිතාන්ය දෙමළ තරුණ සංවිධානය (TYO UK) ඒකාබද්ධ නිවේදනයක් නිකුත් කරමින් ඉල්ලා සිටින්නේ, නාමල් රාජපක්ෂට ලබා දී ඇති මෙම අවස්ථාව වහාම අවලංගු කරන ලෙසයි.
මෙම ආරාධනය හරහා බ්රිතාන්ය දෙමළ ප්රජාවට සහ යුද්ධයෙන් දිවි ගලවා ගත්තවුන්ට සිදුකළ අපහාසය වෙනුවෙන් ඔක්ස්ෆර්ඩ් සහ කේම්බ්රිජ් සංගම් ප්රසිද්ධියේ සමාව අයැදිය යුතු බවත්, යුද අපරාධ, ජන සංහාර සහ මානව හිමිකම් උල්ලංඝනය කිරීම් සම්බන්ධයෙන් චෝදනා ලැබූ පුද්ගලයන්ට වේදිකාවක් ලබා නොදීමේ ප්රතිපත්තියක් (Non-platforming policy) අනුගමනය කළ යුතු බවත් එම සංවිධාන අවධාරණය කරයි.
රාජපක්ෂ පවුල පාලනය කළ යුද සමයේ සිදුවූවා යැයි කියන සිවිල් වැසියන් ඉලක්ක කරගත් ප්රහාර, ලිංගික ප්රචණ්ඩත්වය සහ පුද්ගලයන් අතුරුදහන් කිරීම් පිළිබඳ වගකීමෙන් මන්ත්රීවරයාට මිදිය නොහැකි බව විරෝධතාකරුවන් පෙන්වා දෙයි. නාමල් රාජපක්ෂ හුදෙක් දේශපාලන චරිතයක් පමණක් නොව, එම “ජන සංහාරක යාන්ත්රණයේ” උරුමක්කාරයෙකු සහ ආරක්ෂකයෙකු බවට ද ඔවුහු චෝදනා කරති.
මීට අමතරව, නීති විභාග වංචා සහ රුපියල් මිලියන 70ක මුදල් අවභාවිතය සම්බන්ධයෙන් ඔහුට එරෙහිව ඇති චෝදනා ද පෙන්වා දෙන විරෝධතාකරුවන් පවසන්නේ, මෙවැනි පුද්ගලයෙකුට ගෝලීය මට්ටමේ කීර්තිමත් වේදිකාවක් ලබාදීම යුක්තිය පසිඳලීමේ ක්රියාවලියට බාධාවක් බවයි. මන්ත්රීවරයාගේ පැමිණීමට එරෙහිව සාමකාමීව විරෝධය පළ කිරීමට මෙම සංවිධාන තීරණය කර තිබේ.
