ජාතික ජන බලවේගය නියෝජනය කරමින් එළඹෙන පළාත් පාලන මැතිවරණය සඳහා තරඟ වදින කණ්ඩායම් අද (17) දින පෙරවරුවේ සිට නාමයෝජන පත්‍ර සඳහා අත්සන් තැබීම බත්තරමුල්ල පැලවත්තේ පිහිට එම පක්ෂ මූලස්ථානයේදී ආරම්භ කරනු ලැබීය.
එම අවස්ථාවට ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා, ජාතික ජන බලවේගයේ ලේකම්, පාර්ලිමේන්තු මන්ත්‍රී නිහාල් අබේසිංහ, කොළඹ මහ නගර සභාවේ සහ කඩුවෙල මහ නගර සභා කණ්ඩායම් නායකයින් එක්වී සිටියහ.
එහිදී මාධ්‍ය වෙත අදහස් දැක්වූ ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා සඳහන් කළේ, මන්ත්‍රීවරු කොන්ත්‍රාත් කරන, කප්පම් ගන්න, පගා ගහන දේශපාලනය වෙනුවට මන්ත්‍රීවරු, නගරාධිපතිවරු, නගරාධිපතිවරියෝ ජනතාව එක්ක එකතු වී වැඩ කරන දේශපාලන සංස්කෘතියක් ජාතික ජන බලවේගය විසින් ඇති කරන බවය.
එහිදී අදහස් දැක්වූ ජාතික ජන බලවේගයේ ලේකම්, පාර්ලිමේන්තු මන්ත්‍රී නිහාල් අබේසිංහ සඳහන් කළේ, මෙවර පළාත් පාලන මැතිවරණයේ තීරණාත්මක වෙනසක් වෙනුවෙන් ජනතාව මාලිමාව වටා පෙළගැසෙන බව විශ්වාස බවය.
එමෙන්ම් එහිදි අදහස් දැක්වූ කොළඹ මහ නගර සභා කණ්ඩායම් නායිකා, ව්‍රායි කැලී බල්තසාර් සඳහන් කළේ ජාතික ජන බලවේගය සඳහා ඉතාමත් ශක්තිමත් කණ්ඩායමක් ඉන්නා බව පාර්ලිමේන්තු මැතිවරණයේදිත් පෙන්වා දුන් බවත් එය පළාත් පාලන මැතිවරණයේදිත් පෙන්නුම් කෙරෙන බවත් කොළඹ මහ නගර සභාව ඇතුළුව රටේම පළාත් පාලන ආයතන ජාතික ජන බලවේගය විසින් ජයග්‍රහණය කරන බවත්ය.
කඩුවෙල මහ නගර සභාවේ කණ්ඩායම් නායක රංජන් ජයලාල් සඳහන් කළේ, කඩුවෙල මහ නගර සභාවෙන් මෙතෙක් ජනතාව ගෙවන බදු මුදලට සාධාරණයක් ඉටු නොවූ බවත් ජාතික ජන බලවේගයේ කණ්ඩායම වරදානයක් වරප්‍රසාදයක් නොලබා වගකීමක් ලෙස බාරගෙන කඩුවෙල පුරවරය සංවරධනය කීරීමට සූදානම් බවය.
