තමා අත්අඩංගුවට ගැනීමේ නියෝගය අත්හිටුවන අතුරු තහනමක් ඉල්ලා පොලිස්පති දේශබන්දු තෙන්නකෝන් විසින් පසුගිය 10 වැනිදා ගොනුකළ රීට් පෙත්සම විභාගයට ගැනීමකින් තොරවම ප්‍රතික්ෂේප කිරීමට අභියාචනාධිකරණය කටයුතු කර තිබේ.
ඒ අනුව දේශබන්දු තෙන්නකෝන් මහතා වහාම අත්අඩංගුවට ගෙන අධිකරණයට ඉදිරිපත් කිරීමට පියවර ගන්නා ලෙසත් විනිසුරු මඩුල්ල විසින් අපරාධ පරීක්ෂණ දෙපාර්තමේන්තුවට නියෝග කර ඇත.
අභියාචනාධිකරණයේ වැඩබලන සභාපති විනිසුරු මොහොමඩ් ලෆාර් තාහීර් සහ සරත් දිසානායක ප්‍රමුඛ විණිසුරු මඩුල්ලක් හමුවේ අද (17) එය කැඳවනු ලැබීය.
පොලිස්පති දේශබන්දු තෙන්නකෝන් අත්අඩංගුවට ගන්නැයි මාතර මහේස්ත්‍රාත් අධිකරණය පසුගිය පෙබරවාරී මස 28 වැනිදා නියෝගයක් නිකුත් කළේය.
ඒ, පසුගිය 2023 දෙසැම්බර් 31වනදා මාතර, වැලිගම පැලෑන ප්‍රදේශයේ W 15 හෝටලය ඉදිරිපිට සිදුවූ වෙඩි තැබීමේ සිදුවීමට අදාළව 6314/23 නඩු අංකය යටතේ සිදුකෙරෙන නීතිමය කටයුතුවලට අදාළව මනුෂ්‍ය ඝාතනයක් සඳහා කුමන්ත්‍රණය කිරීමේ චෝදනාව යටතේ පොලිස්පති දේශබන්දු තෙන්නකෝන්, කොළඹ අපරාධ කොට්ඨාසයේ ස්ථානාධිපති ඇන්ස්ලම් ද සිල්වා ඇතුළු සැකකරුවන් 08 දෙනෙකු මෙසේ අත්අඩංගුවට ගෙන අධිකරණයට ඉදිරිපත් කරන ලෙස දන්වමිනි.
කෙසේ වෙතත් හිටපු පොලිස්පති දේශබන්දු තෙන්නකෝන් හැර අනෙක් සැකකරුවන් අත්අඩංගුවට නොගන්නා ලෙස නීතිපති විසින් දැනුම්දී ඇත.
