වතිකානුවේ තොරතුරු අනුව, සති දෙකක් පුරා නියුමෝනියාවෙන් පීඩා විඳින අති උතුම් ෆ්‍රැන්සිස් පාප් වහන්සේගේ සෞඛ්‍ය තත්ත්වය දැන් ක්‍රමයෙන් ස්ථාවර වෙමින් පවතින බව සඳහන් වේ. බීබීසී පුවත් සේවය මෙම තොරතුරු වාර්තා කර ඇත්තේ වතිකානු මූලාශ්‍ර උපුටා දක්වමිනි.
පසුගිය සිකුරාදා රාත්‍රියේදී, පාප් වහන්සේ වමනය කිරීමෙන් පසු හුස්ම ගැනීමේ දැඩි අපහසුතාවයකට මුහුණ දුන් අතර, එම හේතුව නිසා කෘතිම ඔක්සිජන් ලබාදීමට වෛද්‍යවරුන්ට සිදුවිය. සෙනසුරාදා වන විට, වතිකානය විසින් නිවේදනයක් නිකුත් කරමින් පැවසුවේ පාප් වහන්සේගේ තත්ත්වය වැඩිදියුණු වී ඇති බවත්, ඔක්සිජන් ප්‍රතිකාරය සාර්ථක වී ඇති බවත්ය.
“සාමකාමී රාත්‍රියකින් පසු, පාප් වහන්සේ දැන් විවේකය ලබමින් සිටින අතර උදෑසන ආහාර ගෙන කෝපි පානයද කර ඇත,” යනුවෙන් වතිකානු ප්‍රවෘත්ති සේවය තවදුරටත් දැනුම් දුන්නේය.
කෙසේ වෙතත්, ප්‍රතිකාර කරන වෛද්‍ය කණ්ඩායම අවධාරණය කර ඇත්තේ උන්වහන්සේගේ සෞඛ්‍ය තත්ත්වය පිළිබඳ අවසන් තීරණයක් ගැනීමට තවත් පැය 24 සිට 48 දක්වා කාලයක් අවශ්‍ය වන බවයි.
අවුරුදු 88ක් වයසැති පාප් වහන්සේ පෙනහළු ආසාදනයක් හේතුවෙන් පසුගිය 14 වැනි දින රෝමයේ ගැමේලි රෝහලට ඇතුළත් කරන ලදී.
