ශ්‍රේෂ්ඨාධිකරණය ඉදිරියේ විභාග කරන ලද මූලික අයිතිවාසිකම් පෙත්සමකින් වැරදිකරුවෙකු කළ අභියාචනාධිකරණයේ හිටපු සභාපති නිශ්ශංක බන්දුල කරුණාරත්න ශ්‍රේෂ්ඨාධිකරණ විනිසුරුවරයෙකු ලෙස පත් කිරීමට හිටපු ජනාධිපති රනිල් වික්‍රමසිංහ ගෙනගිය නීති විරෝධී ක්‍රියාමාර්ග මේ වනවිට මුළුමනින් ම පරාජය කර තිබේ.
මේ සම්බන්ධයෙන් බීබීසී සිංහල වෙබ් අඩවිය පළ කර තිබූ සවිස්තර වාර්තාව පහතින්.
නිශ්ශංක බන්දුල කරුණාරත්න විශ්‍රාම පූර්ව නිවාඩු ගනී
අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න විශ්‍රාම පූර්ව නිවාඩු ලබා ගෙන ඇති බවත් එය ජනාධිපතිවරයා අනුමත කළ බවත් ජනාධිපති මාධ්‍ය අංශය අද (පෙබරවාරි 2 වැනිදා) නිවේදනය කළේය.
ඔහු මෙලෙස විශ්‍රාම පූර්ව නිවාඩු ලබා ගෙන ඇත්තේ, ඔහුට එරෙහිව දෝෂාභියෝගයක් ඉදිරිපත් කිරීමට රජය තීරණය කර ඇති පසුබිම තුළ ය.
ඒ අනුව අභියාචනාධිකරණයේ වැඩ බලන සභාපති විනිසුරු ලෙස මොහොමඩ් ලෆාර් තාහිර් පත් කළ බව ජනාධිපති මාධ්‍ය අංශය සඳහන් කළේය.
රාජ්‍ය සේවයේ යම් තනතුරක් දරන්නෙකුට හිමි නිවාඩුවලින් ලබා නොගත් නිවාඩු ගණනය කර විශ්‍රාම කාලය සම්පුර්ණ වීමට පෙර විශ්‍රාම ලබා ගැනීම විශ්‍රාම පූර්ව නිවාඩු ලබා ගැනීම ලෙස හඳුන්වනු ලැබේ.
විශ්‍රාම ගන්නා දිනට පුර්වාසන්න මාස 03ක කාලය තුළට ගැනෙන රජයේ වැඩ කරන දින ගණනට සමාන ඉතිරි කර ගත් නිවාඩු නිලධාරියෙකු සතුව තිබේ නම් නිලධාරියාට මාස 03ක උපරිමයකට යටත්ව විශ්‍රාම පූර්ව නිවාඩු ලබාගත හැකිය. එලෙස පූර්වාසන්න මාස 03ට ගැනෙන රජයේ වැඩ කරන දින ගණනට සමාන දින ගණනක් ඉතිරි කර ගත් නිවාඩු නොමැති නිලධරයෙකුට ඉතිරි කර ගත් නිවාඩු සංඛ්‍යාවට සමාන වැඩ කරන දින ගණනක් විශ්‍රාම පූර්ව නිවාඩු ලෙස ලබා ගත හැකිය.
ඒ අනුව දැනට අභියාචනාධිකරණයේ සිටින ජ්‍යෙෂ්ඨතම විනිසුරුවරයා වන මොහොමඩ් ලෆාර් තාහිර් වැඩබලන අභියාචනාධිකරණ සභාපති ධූරයට පත් කර තිබේ.
ව්‍යවස්ථාදායක සභාවේ තීරණයට එරෙහි පෙත්සම
ඉකුත් පාලන සමයේ අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න ශ්‍රේෂ්ඨාධිකරණ විනිසුරු ධූරය සඳහා නම් කරමින් එවකට සිටි ජනාධිපති රනිල් වික්‍රමසිංහ විසින් ඔහුගේ නම ආණ්ඩුක්‍රම ව්‍යවස්ථාදායක සභාව වෙත යෝජනා කර තිබිණි.
එම නාම යෝජනාව පිළිබඳව සලකා බැලූ ආණ්ඩුක්‍රම ව්‍යවස්ථාදායක සභාවේ බහුතර සමාජිකයෝ ජනාධිපතිවරයා ඉදිරිපත් කළ නිශ්ශංක බන්දුල කරුණාරත්නගේ නාම යෝජනාව ප්‍රතික්ෂේප කිරීමට තීන්දු කළහ.
පසුව, ආණ්ඩුක්‍රම ව්‍යවස්ථාදායක සභාවේ එම තීරණය තුළින් අධිකරණයේ ස්වාධීනත්වයට බලපෑමක් වන බවත් ඒ තුළින් සිය මූලික මිනිස් අයිතිවාසිකම් උල්ලංඝණය වන බවටත් තීන්දුවක් ලබා දෙන ලෙසත් ඉල්ලා වේයන්ගොඩ ප්‍රදේශයේ පදිංචි නීතිඥවරයෙකු වන බී.පී.එම්.එස් පතිරත්න ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කළේ ය.
එම මූලික අයිතිවාසිකම් පෙත්සම ප්‍රීති පද්මන් සූරසේන, අචල වෙංගප්පුලි සහ මහින්ද සමයවර්ධන යන විනිසුරුවරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ විභාගයට ගන්නා ලදී.
එම පෙත්සමේ දී ඉදිරිපත් වු කරුණු සලකා බැලු විනිසුරු මඩුල්ල නිශ්ශංක බන්දුල කරුණාරත්න ශ්‍රේෂ්ඨාධිකරණ විනිසුරු ධූරය සඳහා උසස් කිරීමට එවකට ජනාධිපති රනිල් වික්‍රමසිංහ විසින් ඉදිරිපත් කරන ලද නාම යෝජනාව ප්‍රතික්ෂේප කිරීම සඳහා ආණ්ඩුක්‍රම ව්‍යවස්ථාදායක සභාවේ බහුතර සාමාජිකයින් විසින් ගනු ලැබූ තීරණය නිවැරදි බවත් ඊට අදාළ සුළුතර තීන්දුව තුළ කිසිදු නීතිමය පදනමක් නොමැති බවත් විනිසුරු ප්‍රීති පද්මන් සූරසේන විසින් ප්‍රකාශ කර තිබිණි.
වගඋත්තරකරුවන් විසින් කිසිදු ආකාරයකින් පෙත්සම්කරුගේ මූලික මිනිස් අයිතිවාසිකම් උල්ලංඝණය කර නොමැති බවත්, ඒ අනුව අදාළ පෙත්සම නිෂ්ප්‍රභ කරන බවත් විනිසුරුවරයා සිය තීන්දුවේ සඳහන් කළේය.
ඒ අනුව අදාළ පෙත්සමේ වගඋත්තරකරුවන් වශයෙන් නම්කර සිටි ආණ්ඩුක්‍රම ව්‍යවස්ථාදායක සභාවේ සාමාජිකයින් වන ආචාර්ය ප්‍රතාප් රාමනුජම්, ආචාර්ය දිල්රුක්ෂි අනුලා විජේසුන්දර සහ මහාචාර්ය ඩබ්ලිව්.වී.ඒ. දිනේෂා සමරත්න යන අයට පෙත්සම්කරු රුපියල් ලක්ෂ 05ක් බැගින් නඩු ගාස්තු ගෙවිය යුතු බවත් එම තීන්දුවේ සඳහන් විය.
දෝෂාභියෝගයක් ගේන්න රජය ගත් තීරණය
අභියාචනාධිකරණ සභාපති නිශ්ශංක බන්දුල කරුණාරත්නට එරෙහිව දෝෂාභියෝගයක් ඉදිරිපත් කිරීමට රජය තීරණය කර ඇතැයි මීට ඉහත දී මහජන ආරක්ෂක නියෝජය අමාත්‍ය නීතිඥ සුනිල් වටගල බීබීසි සිංහල වෙත ප්‍රකාශ කළේය.
“අභියාචනාධිකරණයේ සභාපති විනිසුරුවරයාට එරෙහිව එවැනි දෝෂාභියෝග යෝජනාවක් ඉදිරිපත් කරන්න රජය තීරණය කර තිබෙනවා. ඒ සඳහා අත්සන් ද අරගෙනයි තියෙන්නේ,” යනුවෙන් ඔහු පැවසීය
