ඉරානයේ න්‍යෂ්ටික මධ්‍යස්ථාන වෙත ඇමෙරිකාව එල්ල කළ ප්‍රහාරයට ප්‍රතිචාර වශයෙන්, ලෝක බොරතෙල් වෙළඳාමේ ප්‍රධාන නාවික මාර්ගයක් වන හෝමුස් සමුද්‍ර සන්ධිය වසා දැමීමට ඉරාන පාර්ලිමේන්තුව ඡන්දයෙන් තීරණය කර ඇත. මෙම පියවර හේතුවෙන් ගෝලීය බලශක්ති සැපයුමට සහ ලෝක ආර්ථිකයට දැඩි බලපෑමක් එල්ල විය හැකි බවට අනතුරු ඇඟවී තිබේ.
පර්සියානු බොක්ක, ඕමාන් බොක්ක සහ අරාබි මුහුද යා කරන හෝමුස් සමුද්‍ර සන්ධිය, ලෝක බොරතෙල් පරිභෝජනයෙන් 20%කට සමාන දෛනික බොරතෙල් බැරල් මිලියන 20ක් ප්‍රවාහනය කරන ලොව වැදගත්ම බලශක්ති මාර්ගයකි. ද්‍රව වායු අපනයනය සඳහා ද මෙම මාර්ගය තීරණාත්මක වේ.
මෙම තීරණය ක්‍රියාත්මක වුවහොත් සෞදි අරාබිය, ඉරාකය, එක්සත් අරාබි එමීර් රාජ්‍යය සහ කුවේට් වැනි ප්‍රධාන තෙල් නිෂ්පාදකයින්ගේ අපනයන මුළුමනින්ම පාහේ අඩාල වනු ඇත. විකල්ප නල මාර්ගවලට හැසිරවිය හැක්කේ දෛනිකව බැරල් මිලියන 2.6ක් වැනි සුළු ප්‍රමාණයක් පමණි.
මෙම තර්ජනයත් සමඟ ලෝක වෙළෙඳපොළේ බොරතෙල් මිල බැරලයක් ඩොලර් 90 සීමාවට ක්ෂණිකව ඉහළ ගිය අතර, සමුද්‍ර සන්ධිය සැබවින්ම වැසුවහොත් මිල ඩොලර් 120-150 දක්වා ඉහළ යා හැකි බවට විශ්ලේෂකයෝ අනතුරු අඟවති.
මේ අතර, එක්සත් ජනපද රාජ්‍ය ලේකම් මාර්කෝ රූබියෝ, මෙම පියවර ගැනීමෙන් වළකින ලෙස ඉරානයට බලපෑම් කරන මෙන් චීනයෙන් ඉල්ලා සිටියේය. චීනය ද මෙම සමුද්‍ර සන්ධිය මත යැපෙන බැවින්, එය වසා දැමීම “ආර්ථික සියදිවි නසා ගැනීමක්” වනු ඇති බව ඔහු පෙන්වා දුන්නේය.
කෙසේ වෙතත්, පාර්ලිමේන්තු අනුමැතිය ලැබුණ ද, සමුද්‍ර සන්ධිය වසා දැමීමේ අවසන් තීරණය ගැනීමේ බලය හිමිවන්නේ ඉරානයේ ජාතික ආරක්ෂක කවුන්සිලයටයි. එම කවුන්සිලය ද මෙම තීරණය අනුමත කළහොත්, ඉන්දියාව ඇතුළු ලොව පුරා රටවල ඉන්ධන මිල කෙරෙහි දැඩි බලපෑමක් එල්ල වනු ඇත.
