ජනාධිපතිවරණයේ තැපැල් ඡන්ද ප්‍රකාශ කිරීමට ආසන්නව තිබියදි රජයේ සේවකයන් හට අති විශාල වැටුප් වැඩිවිමක් ලබා දෙන බව ප්‍රකාශ කරමින් ආරම්භ කරන ලද රනිල් වික්‍රමසිංහගේ ඡන්ද පොරොන්දු දීමත් සමඟ ජාත්‍යන්තර මූල්‍ය අරමුදල හදිසි ප්‍රවෘත්ති සාකච්ඡාවක් කැඳවමින් කරුණු පැහැදිලි කර තිබේ.
පසුගිය 12 වෙනි දින පවත්වන ලද එම ප්‍රවෘත්ති සාකච්ඡාවට මූල්‍ය අරමුදලේ සන්නිවේදන දෙපාර්තමේන්තුවේ අධ්‍යක්ෂිකා ජුලී කොසැක් සහභාගි වී සිට ඇත. එහි දී එම අධ්‍යක්ෂිකාව අවධාරණය කර තිබෙන්නේ “ශ්‍රී ලංකාව තවමත් පූර්ණ වශයෙන් ආර්ථික අවදානමෙන් මිදි නැහැ“ යනුවෙනි. ඒ අතර “පුද්ගලික ණය හිමියන් තම ණය ප්‍රතිව්‍යූහගත කිරීමේ යෝජනාව මූල්‍ය අරමුදලට ඉදිරිපත් කර ඇති බවත්, දේශීය ණය ප්‍රතිව්‍යූහ ගත කිරීම සම්පූර්ණ කිරිම මෙන් ම විදේශ නිල ණය හිමියන්ගේ කමිටුව සහ චීන එක්සිම් බැංකුව සමඟ ගිවිසුම්වලට එළඹීමේ ප්‍රධාන සන්ධිස්ථානයක්“ ඉතිරිව පවතින බව අවධාරණය කර ඇත.
මේ අතර, ඉදිරියේදී බලයට පත් වෙන නව රජය සමඟ කටයුතු කිරිමට සූදානම් බව මූල්‍ය අරමුදල මේ වනවිටත් ප්‍රකාශ කර තිබේ. දැනට අත්සන් කර ඇති ගිවිසුමේ කොන්දේසි පිළිබඳ සාකච්ඡා කළ හැකි බව ද එම අරමුදල නිල වශයෙන් දැනුම් දි තිබේ.
