ඉදිරි ජනාධිපතිවරණයෙන් පසු පත්වන නව පාලනය සමඟ තම වැඩසටහන ඉදිරියට ගෙන යාමට සාකච්ඡා කිරීමට සූදානම් බව ජාත්‍යන්තර මූල්‍ය අරමුදල සඳහන් කරනවා. ශ්‍රී ලංකාව මෙම වැඩසටහන මගින් සැලකිය යුතු ජයග්‍රහණ අත්කරගෙන ඇති නමුත් අර්බුදයෙන් ගොඩ ඒමට මෙම ජයග්‍රහණ ආරක්ෂා කර ගැනීම වැදගත් බවයි සහ ජාත්‍යන්තර මූල්‍ය අරමුදල කියන්නේ.
ශ්‍රී ලංකාව සහ ජාත්‍යන්තර මූල්‍ය අරමුදල පිළිබඳව කළ ප්‍රශ්න කිරීමක දී IMF සන්නිවේදන දෙපාර්තමේන්තුවේ අධ්‍යක්ෂ ජූලි කොසැක් ඊයේ (12) මේ බව සඳහන් කළා.
ශ්‍රී ලංකාව IMF සමඟ ඇතිකරගත් වැඩසටහන තුළ උද්දමනය පහළ යමින් ඇති බවත් සංචිත ඉහළ යමින් ඇති බවත් පවසන අධ්‍යක්ෂකවරිය මෙම තත්වය ඉදිරියටද පත්වා ගැනීම අත්‍යවශ්‍ය වන බවයි කියන්නේ. රට තවමත් පවතින්නේ ආර්ථික අර්බුදයක බවත් ලබා ගත් ජයග්‍රහණය ආරක්ෂා කරගැනීම ඉතා වැදගත් බවත් ඇය පවසනවා. ණය ප්‍රතිව්‍යුහගත කිරීමේ සාකච්ඡා සඳහා ජාත්‍යන්තර මූල්‍ය අරමුදල සහභාගි නොවන බවද පවසන ඇය එම සාකච්ඡා සිදු කරන්නේ ණය හිමි සාමාජික රටවල් හා අදාළ රට අතර පමණක් බවයි සඳහන් කරන්නේ.
“මම ලංකාව ගැන කියන්නම්. මොහොතකට ආපස්සට යන්න. 2024 ජූනි 12 වැනි දින, අපගේ විධායක මණ්ඩලය 2024 වගන්තිය IV උපදේශනය සහ Extended Fund Facility (EFF) වැඩසටහනේ දෙවන සමාලෝචනය සම්පූර්ණ කළා. එමඟින් ඩොලර් මිලියන 336ක පමණ ප්‍රවේශයක් රටට ලබා දුන්නා. වැඩසටහන් කාර්යය සාධනය ශක්තිමත්ව පවතිනවා. එසේ වුවද, වැදගත් දුර්වලතා පවතිනවා.
ශ්‍රී ලංකාවේ ජනාධිපතිවරණය පිළිබඳ නිශ්චිත ප්‍රශ්න කිහිපයක් සම්බන්ධයෙන්, පළමුව, සටහන් කර ගැනීම ඉතා වැදගත්. මෙය සැබවින්ම ශ්‍රී ලංකාවේ ජනතාව තීරණය කළ යුතු දෙයක්. IMF වැඩසටහනේ අරමුණු සාක්ෂාත් කර ගැනීම ශ්‍රී ලංකාවට ඉතිහාසයේ දරුණුතම අර්බුදයකින් ගොඩ ඒමට අවස්ථාවක් ලබා දීමේ ප්‍රධාන ප්‍රමුඛතාවයක්.
ණය පිළිබඳ ප්රශ්නය සම්බන්ධයෙන්. IMF කණ්ඩායමක් අගෝස්තු මස මුලදී කොළඹට පැමිණ එම අවස්ථාවේ මාධ්‍ය නිවේදනයක් නිකුත් කළා. මාධ්‍ය නිවේදනයේ සඳහන් කර ඇති පරිදි, දේශීය ණය ප්‍රතිව්‍යුහගත කිරීම ක්‍රියාත්මක කිරීම සහ නිල ණය හිමියන්ගේ කමිටුව සහ චයිනා EXIM බැංකුව සමඟ ගිවිසුම අවසන් කිරීම ප්‍රධාන සන්ධිස්ථානයන් වෙනවා.
එළඹෙන ජනාධිපතිවරණය සම්බන්ධයෙන් නම් එය තීරණය කළ යුත්තේ ශ්‍රී ලංකාවේ ජනතාව යි. ජාත්‍යන්තර මූල්‍ය අරමුදලේ ස්ථාවරය අනුව අපට පෙනෙන්නේ සැලකිය යුතු ජයග්‍රහණ ලබා ඇති වැඩපිළිවෙලක්. අපේ තුන්වන සමාලෝචනයේ කාලය මැතිවරණයෙන් පසුව රජය සමඟ සාකච්ඡා කරන එක.. ඒ නිසා අපි ජනාධිපතිවරණය පවත්වා නව රජයක් පිහිටුවීමෙන් පසුව හෝ ජනතාවගේ තේරීම මත පදනම් වූ ප්‍රතිඵලයෙන් පසුව අපේ වැඩසටහන් සාකච්ඡා සමඟ ඉදිරියට යනවා” යි IMF සන්නිවේදන දෙපාර්තමේන්තුවේ අධ්‍යක්ෂ ජූලි කොසැක් සඳහන් කරනවා.
